Úkimet basshysy Sadyr Japarovtyń Qazaqstanǵa sapary Qazaqstan – Qyrǵyzstan strategııalyq yntymaqtastyǵyn odan ári nyǵaıtýǵa jańa serpin beretinine senim bildirdi. «Búgin joǵary deńgeıde mańyzdy ýaǵdalastyqtarǵa qol jetkizildi. Qazaqstan Úkimeti barlyq máselelerdi sheshý, sondaı-aq ózara qyzyǵýshylyq týdyratyn jańa bastamalardy ázirlep, iske asyrý boıynsha qyrǵyz áriptesterimen syndarly birlesken jumys júrgizýge nıetti», dedi A. Mamın.
Taraptar saýda-ekonomıkalyq, ınvestısııalyq, sý-energetıkalyq, tranzıttik-kólik jáne shekara mańy yntymaqtastyǵynyń ózekti máselelerin, sondaı-aq COVID-19-ǵa qarsy kúres aıasyndaǵy birlesken sharalardy talqylady. О́nerkásipte, aýyl sharýashylyǵynda, bilim berý men týrızmde ózara is-qımyldy odan ári keńeıtý úshin úlken áleýettiń bar ekeni atap ótildi.
Sondaı-aq EAEO jáne basqa da ıntegrasııalyq birlestikter sheńberindegi ózara is-qımyl máseleleri qaraldy. Qazaqstan Qyrǵyzstan ekonomıkasynyń iri ınvestorlarynyń qataryna kiredi. 2005 jyldan bastap Qazaqstannan Qyrǵyzstanǵa tikeleı ınvestısııalardyń jınaqtalǵan kólemi shamamen $1 mlrd quraıdy, QR-da shamamen 1,5 myń qyrǵyz kompanııasy jumys isteıdi. 2020 jyly ekijaqty taýar aınalymy $796,2 mln.
Taraptar bul kórsetkishti $1 mlrd-qa deıin jetkizýge jáne satylatyn taýarlar men qyzmetter nomenklatýrasyn keńeıtýge nıetti. Ekonomıkalyq yntymaqtastyqty jandandyrý maqsatynda jaqynda úkimetaralyq keńestiń kezekti otyrysyn ótkizý josparlanyp otyr.
