Elbasy Nursultan Nazarbaevtyń «Qamqorlyq» bastamasyn iske asyrý maqsatynda Jambyl óńirinde tıisti jumystar júrgizilýde. Nátıjesinde, erekshe qajettiligi bar balalarǵa kóńil bólinip, qoldaý kórsetilýde.
Taraz qalasynda Darıǵa Nursultanqyzy oblys ákimi Berdibek Saparbaevpen birge oblystyq kópsalaly balalar aýrýhanasyndaǵy «Qamqorlyq» ońaltý ortalyǵynyń jáne Taraz qalasyndaǵy №9 ben A.Gaıdar atyndaǵy №35 orta mektepttegi ınklıýzııany qoldaý kabınetteriniń jumysymen tanysty. Atalǵan kabınetterdiń ashylýy nátıjesinde búginde erekshe bilim alýǵa qajettiligi bar 22 bala óz qatarlarymen birge mektepte oqýǵa múmkindik alǵan. Buryn bul balalar úıde oqyǵandyqtan, olar logoped, defektolog pen psıholog sııaqty mamandardyń járdemin turaqty túrde ala almaǵan.
D.Nazarbaeva ortalyqtaǵy kabınetterdi aralap, ata-analarmen jáne balalarmen áńgimelesti. Munda búginde neıro-ortopedııalyq aýrýlary bar 80 bala ońaltýdan ótýde. Al mekeme ashylǵan sátten bastap óńirden erekshe qajettilikteri bar 200-ge jýyq bala kómek alǵan. Atalǵan ortalyqtyń kólemi 1500 sharshy metrdi quraıdy. Onyń ishinde 2 basseın bar. Basqa da múmkindikter qarastyrylǵan.
Taraz qalasyndaǵy «Qamqorlyq» ońaltý ortalyǵynyń dırektory Raısa Qojamjarova Darıǵa Nursultanqyzyna keshendi ońaltý tujyrymdamasy men kórsetiletin ońaltý is-sharalarynyń túrleri týraly málimet berdi. Munda dárigerlerdiń konsýltasııalary, mehanoterapııa, emdik dene shynyqtyrý, sensorlyq jáne ınteraktıvti bólmelerde logoped, defektolog, psıholog, ergoterapevt mamandarynyń sabaqtary, sondaı-aq mıneraldy sýmen emdeý, fızıoemdeý jáne basqa da em túrleri bar. Qaladaǵy «Qamqorlyq» ortalyqtarynda tıisti oqytýdan ótken bilikti mamandar jumys isteıdi.
Byltyr oblystyq balalar aýrýhanasy janyndaǵy ortalyqtyń 24 mamany biliktilikti arttyrý jáne qaıta daıarlaý kýrstarynan ótken bolsa, bıyl kóshpeli semınarǵa 32 qyzmetker qatysqan. Jyl sońyna deıin reabılıtologııa salasyndaǵy ózekti máseleler boıynsha sheteldik mentorlardyń qyzmetkerlerin oqytý josparlanýda. Osy rette «Qamqorlyq» qory dırektorynyń mindetin atqarýshy Araılym Erkinova balalardy qoljetimdi jerde sapaly ońaltýdan ótkizý maqsatynda atalǵan qor ońaltý ortalyǵyna jetekshilik etýdi jalǵastyrýǵa nıetti ekenin jetkizdi. Ortalyq jyl saıyn 600-den astam neıro-ortopedııalyq, onyń ishinde serebraldy sal aýrýy bar balalardy tegin qabyldaıtyn bolady. Mundaı ortalyqtar elimizdiń Almaty, Atyraý, Batys Qazaqstan, Shyǵys Qazaqstan, Túrkistan, Qostanaı oblystarynda jáne Nur-Sultan qalasynda ashylǵan. Jalpy, Elbasynyń bul bastamasy jylyna 5 myń balany ońaltýǵa múmkindik beredi. Jańa ortalyqtardyń jumysy nátıjesinde serebraldy sal aýrýy bar balalardy ońaltý kórsetkishi 20 paıyzǵa ósken.
Kezekti saparynda Darıǵa Nursultanqyzy Shymkenttegi jasóspirimderge arnalǵan «Qamqorlyq» ońaltý ortalyǵynyń jumysymen tanysty. Sondaı-aq atalǵan ortalyqtaǵy pedagogterdiń túzetý kýrstaryna, emdik dene shynyqtyrý jáne mehanoterapııanyń jeke sabaqtaryna qatysty. Bul ortalyq ótken jyldyń jeltoqsan aıynda Elbasynyń «Qamqorlyq» bastamasy aıasynda ashylyp, Shymkent qalasyndaǵy oblystyq balalar aýrýhanasynyń ǵımaratyna ornalasqan edi. Kishkentaılarǵa em-dom jasaıtyn nysannyń jalpy aýdany – 250 sharshy metr. Munda damýynda aýytqýy bar erte jastaǵy balalar 21 kúnnen astam kýrstan ótip, ambýlatorııalyq jáne stasıonarlyq emdi tegin ala alady. Ár bala saraptamalyq synyptaǵy elektroensefalografta jáne keshendi aýdıometrde dıagnostıkalyq tekserýden ótip turady.
Elbasynyń atalyq qamqorlyǵyna alǵys aıtqan ortalyq dırektory Lázzat Kýchkarova mundaı zamanaýı jabdyqtar osy ýaqytqa deıin Túrkistan oblysynda tek jekemenshik ortalyqtarda ǵana bolǵanyn aıtty.
«Mamandar tobynyń az bolǵanyna qaramastan, ár balaǵa 70-ke deıin ońaltý qyzmetin usynyp kelemiz. Úsh ońaltý kýrsynan keıin balalardyń densaýlyǵy qalpyna kele bastaıdy. Keshendi emdeý-saýyqtyrýdyń nátıjesi bul ádistiń tıimdiligin taǵy da dáleldep berdi. Qazirgi tańda ár balada oń dınamıka baıqalady. Bes sábıimiz ońaltý sabaqtarynan keıin alǵashqy qadamdaryn jasady», dedi L.Kýchkarova.
Jumysy júıeli, baǵyty aıqyn ortalyqtyń aldaǵy jospary – jyl sońyna deıin 400 balany emdeý. Qýantarlyǵy, Nursultan Nazarbaev qory bul jobanyń tıimdiligi men qajettiligin eskere otyryp, Elbasynyń «Qamqorlyq» bastamasynyń ekinshi kezeńi aıasynda osyndaı ortalyqtardyń ashylýyn jalǵastyrýdy kózdep otyr.
Túrkistan oblysyndaǵy jumys sapary barysynda Darıǵa Nazarbaeva atalǵan bastama aıasynda ashylǵan ınklıýzııany qoldaý kabınetterin de aralap kórdi. Kabınetter №1 A.Baıtursynov atyndaǵy jalpy orta mektepte jáne oblys ortalyǵyndaǵy №21 jalpy orta mektebinde ornalasqan. Olar arnaıy jıhazdarmen jáne tehnıkalyq jabdyqtarmen, ınteraktıvti taqtamen, Montessorı materıaldarymen, dıdaktıkalyq quraldarmen jabdyqtalǵan.
Inklıýzııany qoldaý kabınetterinde Darıǵa Nursultanqyzy balalarmen tanysyp, olardyń jeke assıstentterimen (tıýtorlarymen) áńgimelesti. Tıýtor súıemeldeýimen aýtıstik spektri buzylǵan árbir oqýshy ádettegi synyptaǵy sabaq kezinde de, ınklıýzııany qoldaý kabınetinde de bilim ala alady. Al ondaǵy assıstenttiń negizgi mindeti – balaǵa múmkindiginshe óz betinshe ómir súrýge kómektesý.
Qor dırektory mektep sabaqtaryna qatysyp, erekshe oqýshylardyń synyptyń jalpy jumysyna qalaı beıimdeletinin tekserip kórdi.
Sapar sońynda Darıǵa Nazarbaeva Elbasynyń qamorlyǵymen júzege asqan joba aıasynda áli talaı ıgi jumys júzege asatynyn tilge tıek etti.
Hamıt ESAMAN,
Nurshat TО́KEN,
«Egemen Qazaqstan»
