Ashyqtyq alǵysharty

Bul jóninde agenttiktiń áleýmettik jeli­le­rinde tikeleı efırde ótken baspasóz máslı­haty barysynda agenttiktiń asa mańyzdy ister jónindegi tergeýshisi Danııar Bekaıdarov málimdedi. Jemqorlyq faktileri týraly habarlaǵan nemese bul qoǵamdyq indetke qarsy turýǵa ózge de jolmen kómek kórsetken adamdardy kótermeleý jaıynda jan-jaqty aqparat bergen agenttik ókili: «Qazirgi jaǵdaıda kez kelgen memlekettik organ qoǵamnyń qoldaýymen ǵana tabysqa jete alady», dep atap ótti.

Jemqorlyqty aýyzdyqtaý úshin halyqtyń belsendiligi qajet ekenin jetkizgen ol agent­tik­tiń ashyqtyq qaǵıdatyn túrli baılanys arnalary arqyly, atap aıtqanda, Antikor Live, Antikor News jobalary, Facebook, Instagram, Telegram jelileriniń kómegimen júzege asyryp keletinin de atap ótti. Elimizdiń ekonomıkalyq da­mýyna tejeý bolyp, básekelestik qabiletti báseń­detetin áleýmettik dertpen kúres júrgizý – jal­pyhalyqtyq is. Osyǵan oraı agenttik qyz­met­kerleri bul máselege beıjaı qaramaıtyn azamattardy Sybaılas jemqorlyqqa qarsy is-qımyl agenttiginiń 1424 Call-ortalyǵyna qoǵam dertiniń kez kelgen kórinisi týraly habar berýge shaqyrady.

«Call-ortalyq tegin aqparattyq-konsýl­ta­sııalyq qoldaý kórsetýge qashanda daıyn. Ope­ratorlar agenttiktiń qyzmeti týraly su­raq­tarǵa jaýap berip qana qoımaı, qyzmet­ker­leriniń ústinen túsken aryz-shaǵym, usynystar men pikirlerdi qabyldap, jumysqa túsý tártibin de túsindiredi. Ortalyq jemqorlyq faktileri, onyń ishinde ja­sal­ǵan nemese daıyndalyp jatqan quqyq buzý­shy­lyqtar jóninde, sondaı-aq kásipkerlik qyzmetke kedergi keltirý jaǵdaılary týraly telefon habarlamalaryna táýlik boıy den qoıady», dedi or­ta­lyq­tyń ju­mysy týraly jan-jaqty málimet bergen ter­geýshi.

Sybaılas jemqorlyq týraly qońyraý túsken kezde operator abonentti dereý agenttiktiń kezekshi ofıserimen qosady. Al ol óz kezeginde bul habarlamany tirkep, jedel den qoıý sharalaryn qabyldaıdy. Osylaısha, árbir habarlama ýaqtyly tekserilip, jetkilikti negizder bolǵan jaǵdaıda sotqa deıingi tergep-tekserý bastalady. «Halyq tikeleı baılanys arqyly jemqorlyq faktileri týraly jergilikti departamentterge de habarlaı alady. Eger kináliniń qylmysy rastalyp, oǵan qatysty ákimshilik jaza qoldaný týraly sot qaýlysy nemese aıyptaý úkimi zańdy kúshine ense, osy jóninde aqparat bergen, bolmasa basqa da joldarmen járdemdeskenderge birjolǵy aqshalaı syıaqy tólenedi», dedi bul jóninde agenttik qyzmetkeri. Esterińizde bolsa, ótken jyly yntalandyrý erejelerine biraz ózgerister engizilgen bolatyn. Germanııa, Ulybrıtanııa, AQSh sekildi EYDU elderiniń tájirıbesine súıene otyryp, syıaqy somasy saralanǵan edi.

Endi para nemese keltirilgen zalal somasy 1 myń aılyq eseptik kórsetkishten (ıaǵnı 2 mln 778 myń teńgeden) aspaıtyn sybaılas jemqorlyq týraly habarlama úshin syıaqy qylmystyń aýyrlyǵyna qaraı 30-dan 100 AEK-ke deıin quraıdy. Al buryn kótermeleýdiń eń joǵary mólsheri 100 eseptik kórsetkishten, ıaǵnı 277 myń 800 teńgeden aspaıtyn. Taldaý jumystary halyqtyń kóbinese paraqorlyq, sosyn urlyq pen laýazymdyq ókilettikterdi teris paıdalaný faktileri boıynsha habarlasatynyn kórsetip bergen.

Aqshalaı yntalandyrý – sybaılas jem­qor­lyqpen kúresti kúsheıtip, onyń aldyn alý tıimdi­li­gin arttyrýda tıimdi tásilderdiń biri. «Bul qadam azamattyq ustanymdy qalyptastyryp qana qoı­maı, jemqorlyqqa jol bermeýde el-jurttyń sana­sy­na oń áser etedi», deıdi agenttik ókili.