– Birinshi naýryzdan bastap 1-5 synyp, al halyqaralyq mektepterde 1-7 synyp oqýshylary aralas oqý formatynda oqıdy. Mektep bitiretin 9, 11 jáne 12-synyptarǵa da osyndaı tártippen oqýǵa ruqsat berildi. Al bala sany 300-den aspaıtyn qala men aýyl mektepterindegi barlyq synyp oqýshylary offlaın bilim alady. Buǵan qosa, bilim berý mekemesi ákimshiliginiń sheshimi boıynsha sabaqtan tys ýaqytta 5 adamnan aspaıtyn toptarda oqýshylardy jeke oqytýǵa bolady. Shekteýler jeńildetildi, biraq bosańsýǵa bolmaıdy, – dedi oblystyq sanıtarııalyq-epıdemıologııalyq baqylaý departamenti basshysynyń mindetin atqarýshy Álııa Ábdiqaıymova.
Kóktemniń birinshi kúninen qashyqtan oqytyp kelgen mektepterdegi 1-5-synypta oqıtyn 82 201 balanyń 81 070-i dástúrli oqýdy bastap ketti. Oblystyq bilim basqarmasynyń basshysy Aqzıra Qasymovanyń aıtýynsha, ınfeksııanyń taralý qaýpin boldyrmaý úshin oqýshylar 5 satydan turatyn dezınfeksııadan ótedi. Oflaın formatta bilim alatyn shákirtter sany kóbeıip kele jatqanyn mynadan-aq kórýge bolady:
I toqsanda oqýshylardyń 79 paıyzy qashyqtan, 21 paıyzy dástúrli bilim alsa, 1 naýryzdan bastap mektepke keletinder qatary 71 paıyzǵa jetken. Bilim basqarmasynyń basshysy mektep formasyna qatysty da qatań talap qoıylyp otyrmaǵanyn jetkizdi. Qaýlydaǵy ózgeris epıdemııalyq ahýaly turaqty óńirler qatarynda turǵan Syr boıynda biraz nysandardyń jumysyn jandandyrýǵa jol ashyp otyr. Biraq merekelik korporatıvterdi uıymdastyrý men ótkizýge, býkmekerlik keńselerdiń qyzmetine salynǵan tyıym áli kúshinde tur.
