Premer-Mınıstrdiń orynbasary Eraly Toǵjanovtyń tóraǵalyǵymen ótken Qazaqstan aýmaǵynda koronavırýstyń paıda bolýy men taralýyna jol bermeý jónindegi vedomstvoaralyq komıssııanyń 2 naýryzdaǵy sheshimine sáıkes, Almaty-Dýshanbe-Almaty baǵytynda Qazaqstan men Tájikstan arasyndaǵy turaqty reısterdi qaıta ashýǵa ruqsat etildi.
Tájikstanda Covid-19 ınfeksııasynyń taralýyn boldyrmaý jónindegi indetke qarsy is-sharalardy kúsheıtý jónindegi respýblıkalyq shtabtyń sheshimine baılanysty bastapqy kezeńde ár taraptan aptasyna 1 reısten ǵana oryndalady.
14 naýryzdan bastap «Eır Astana» áýe kompanııasy Almaty men Dýshanbe qalalary arasynda aptasyna 1 ret (jeksenbi kúnderi) turaqty reıs oryndaýdy josparlap otyr.
Al Tájikstan jaǵynan Almaty men Dýshanbe qalalary arasynda turaqty áýe qatynasyn 18 naýryzdan «Somon Air» áýe kompanııasy aptasyna 1 reıspen (beısenbi kúnderi) qaıta bastaıdy dep josparlanyp otyr.
Reıster sanıtarlyq-epıdemıologııalyq talaptardy qatań saqtaı otyryp jáne áýe kompanııalarynyń saıttarynda jarııalanǵan kestege sáıkes oryndalady.
