Qazaqstandyqtar Densaýlyq saqtaý mınıstri Alekseı Soıdyń vıdeosyn taratýda. Kadrda ol koronavırýstyń gúlder arqyly taralatynyn, sondyqtan 10 naýryzǵa deıin gúlderge jaqyndaýǵa, olardy satyp alýǵa jáne ıiskeýge tyıym salynady dep aıtqan. Bul ázil vıdeo ekeni anyq, biraq keıbireýler ony shyn dep qabyldaǵan.
Rolık mınıstr teledıdarda sóz sóılegen kezde túsirilgen, al daýysy montajdaý barysynda qoıylǵan. Vıdeoda KVI juqtyrýdyń jańa ádisi týraly aıtqan daýystyń Alekseı Soıdiki emestigi anyq estiledi. Densaýlyq saqtaý mınıstrligi habarlamany joqqa shyǵardy.
«Qazirgi kezde áleýmettik jeliler men WhatsApp messendjerinde koronavırýstyq ınfeksııanyń taralýynyń jańa joly – gúlder arqyly beriletini anyqtalǵany týraly aqparat taratylýda. Habarlamada Qazaqstan azamattaryn qaýipsizdik maqsatynda 10 naýryzǵa deıin gúl satyp almaýǵa shaqyrǵan Densaýlyq saqtaý mınıstri Alekseı Soıdyń vıdeosy paıdalanylǵan. QR Densaýlyq saqtaý mınıstrligi bul aqparat shyndyqqa janaspaıtynyn resmı túrde habarlaıdy. Bul vıdeo jalǵan», dep habarlady vedomstvodan.
Aıta keteıik, COVID-19 adamnan adamǵa aýa-tamshy joldarymen juǵady. Vırýs jabyq jáne nashar jeldetiletin jerlerde tez taralady.
KVI-diń aldyn alýdyń eń tıimdi ádisteri – áleýmettik qashyqtyqty saqtaý, maska taǵý jáne adamdar kóp jınalatyn oryndarǵa barýdan bas tartý.
Densaýlyq saqtaý mınıstrligi azamattardy tekserilgen resmı derekkózderge ǵana senip, arandatýshylyqqa berilmeýge úndeıdi.
