Ushqyshsyz ushý apparattarynyń qoldanylý aıasy kún sanap artýda. Olar alǵash ret Qurlyq áskerleri men Áýe qorǵanys kúshterine 2015 jyly engizildi.
ÁQK Áskerı-áýe kúshteri Wing Loong («Pterodaktıl») barlaý-soqqy berý keshenimen jabdyqtalǵan. Ol áýe barlaýyn júrgizý mindetterin oryndaýǵa ǵana emes, sondaı-aq basqarylatyn zymyrandarmen, jaryqshaqty-fýgasty bombalarmen joǵary dáldikte soqqy berýge de qabiletti. Wing Loong ushqyshsyz ushý apparaty 20 saǵatqa deıin avtomatty rejimde jumys isteýge jáne 4 myń shaqyrymǵa deıingi qashyqtyqqa ushýǵa qabiletti. «Pterodaktıl» qanattarynyń qulashy 14 metr, uzyndyǵy 9 metrden sál asady, al maksımaldy salmaǵy 1100 kılony quraıdy. Wing Loong jyldamdyǵy 280 km/saǵ jetedi, 5 myń metr bıiktikke kótere alady jáne 200 kıloǵa deıin júkti kóterýge qabiletti.
Al Qarýly Kúshterdiń Qurlyq áskerleri «SkyLark» taktıkalyq ushqyshsyz ushý apparatymen qamtamasyz etilgen. Onyń jumys ýaqyty – úsh saǵatqa jetedi, 40 shaqyrymǵa deıingi radıýsta jumys isteı alady. Ushqyshsyz ushý apparattaryn is-júzinde qoldaný arnaıy ınfraqurylymdy qurýdy talap etpeıdi. Al qoldaný aıasy aıtarlyqtaı aýqymdy. Atap aıtqanda, barlaý áreketterin júzege asyrýdan, nysanany belgileýden, artıllerııanyń atysyn túzetýden, jerdegi nysanaǵa soqqy avıasııasyn baǵyttaýdan bastap, qarsylastyń erekshe mańyzdy obektiler men olardyń elementterin joıa alady.
2018 jyldan bastap Ulttyq qorǵanys ýnıversıtetiniń ǵylymı-zertteý ortalyǵynda «Shaǵala» ushqyshsyz ushý apparattarynyń tájirıbelik úlgisin daıyndaý boıynsha jumys júrgizilgen bolatyn. Qazirgi tańda áskerı maqsattaǵy alǵashqy qazaqstandyq ushqyshsyz ushý apparaty zaýyttyq jáne polıgondyq tájirıbeden ótýde. Otandyq «Shaǵala» baılanys arnasyn qorǵaýdyń baǵdarlamalyq-apparattyq quralymen, dron men basqarý júıesi arasyndaǵy qorǵalǵan baılanystyń jeke krıptografııalyq hattamasymen, kepildigi bar qupııa kiltpen, tikeleı jáne keri qorǵanyspen jabdyqtalǵan. Munyń barlyǵy ýnıversıtet qabyrǵasynda 2014 jyldan beri júrgizilip kele jatqan áskerı ǵalymdardyń jobasy.
Ushqyshsyz ushý apparattaryn qadaǵalaý men paıdalaný boıynsha mamandardy Áýe qorǵanysy kúshteri áskerı ınstıtýty men ushqyshsyz ushý apparattarynyń mamandary bilim alatyn oqý ortalyǵynda daıarlaýda. Oqý ortalyǵynyń bazasynda jyl saıyn oqý-ádistemelik jıyndar, nusqaýshylardyń jáne avıasııalyq tehnıka operatorlarynyń biliktilikterin arttyrý boıynsha oqytý júrgiziledi.
Aıta keteıik, 2017 jyly Qazaqstan Qarýly Kúshteri Armııa halyqaralyq oıyndaryna ushqyshsyz ushý apparattarynyń operatorlaryna «Suńqar salý» saıysyn qosýǵa baılanysty bastama kótergen. Atalǵan saıysta qazaqstandyq jaýyngerler sózsiz birinshi oryndy ıelenip, árdaıym jeńimpaz atandy. Bul elimizde qarý-jaraqtyń osy túrin sátti qoldanylýy men damýyn rastaıdy.
