Jaýapty vedomstvonyń ókili munaı óńdeý zaýytynan sharýalarǵa dızel otynyn jóneltýge basymdyq beriletinin aıtty. Bul rette baqylaý men monıtorıng táýlik boıy ótkiziledi dep josparlanǵan.
«Munaı ónimderiniń jekelegen túrlerin óndirý men olardyń aınalymyn memlekettik retteý týraly» zańyna sáıkes, Energetıka mınıstrligi Aýyl sharýashylyǵy mınıstrligimen birlesip, óńirlerdi munaı óńdeý zaýyttary men resýrs ustaýshylarǵa bekite otyra kóktemgi dala jumystaryn júrgizýge arnalǵan kesteni daıyndady. Onyń aıasynda aýyl sharýashylyǵy taýar óndirýshilerine Pavlodar munaı-hımııa zaýyty men «Petro Qazaqstan oıl Prodaks» zaýytynan qajetti otynnyń baǵasy tonnasyna 174 myń teńgeden jiberiledi. Atyraý munaı óńdeý zaýytynan tonnasy 172 myń teńgeni quraıtyn jeńildetilgen dızel bólinedi. Josparǵa sáıkes, 380 myń tonna kóleminde dızel otyny qarastyrylyp otyr», dedi vıse-mınıstr.
Quzyrly organnyń aqparatyna súıensek, búginde 12 myń tonnaǵa jýyq janarmaı tıelgen.
Energetıka mınıstrligi Gaz jáne munaı-gaz hımııasy departamentiniń dırektory Qýanysh Sársekeevtiń aıtýynsha, elimizde 1 naýryzdan bastap, kólikterge arnalǵan gaz quıý stansalarynda suıytylǵan munaı gazynyń bólshek saýda baǵalaryn ýaqytsha memlekettik retteý tetigi alynyp tastaldy. Departament basshysy suıytylǵan gazdy satýdy ýaqytsha memlekettik retteý byltyr tótenshe jaǵdaı rejimin qamtamasyz etý jónindegi memlekettik komıssııanyń sheshimi negizinde qabyldanǵanyn jetkizdi.
«Qazir suranys pen usynystyń negizinde kólikterge arnalǵan gaz quıý stansalarynda bólshek saýda baǵalaryn naryq rettep otyr. Energetıka mınıstrligi júrgizgen TMD elderindegi bólshek saýda baǵasynyń taldaýy kórsetkendeı, qazirgi baǵalar pandemııaǵa deıingi
I toqsanǵa qaraǵanda respýblıka boıynsha orta eseppen 5%-ǵa tómen. Iаǵnı búgingi naryqtyq baǵa buryn qoldanysta bolǵan baǵadan da tómen», dedi Q.Sársekeev.
Vedomstvo ókilderi aı saıyn ishki naryqqa suıytylǵan munaı gazyn jetkizý josparyn qalyptastyrý jumysy jalǵasyp jatqanyn aıtty. Janarmaıdyń tórtten bir bóligi elektrondy saýda alańdary arqyly satylyp jatyr. Qalǵany toqsan saıyn mınıstrlik bekitetin kóterme shekti baǵa boıynsha jiberilip keledi.
«Osy jyldyń I toqsanyn QQS esepke almaǵanda baǵa tonnasyna 38 701 teńge kóleminde bekitildi. Bul 2018 jyldan beri ózgermegen. Tek byltyrǵy úshinshi toqsanda suıytylǵan gazdyń álemdik baǵasy tómendegenine baılanysty QQS-syz tonnasy 28 myń teńgege deıin tómendegen edi», dedi departament dırektory.
Búginde otandyq munaı ónimderiniń jıyntyq qory qolaıly deńgeıde. Atap aıtqanda, benzın 225 myń tonnany qurap, bul elimizdiń 20 táýliktik qajettiligin óteýge jetkilikti. Al dızel otyny 298 myń tonnaǵa jetip, sáıkesinshe bul ishki naryqtyń qajettiligin 27 táýlikke qamtamasyz etýge múmkindik beredi.
«Baǵany belgileýdegi negizgi faktorlarǵa – Qazaqstandaǵy munaı quny, ishki baǵalar, munaı óńdeý boıynsha qyzmet, salyqtar men aksızder, zerthanalyq synaqtar men qospalar boıynsha shyǵystar, banktik qaryzdarǵa qyzmet kórsetý, sısternalardy berý-jınaý, taýardy tasymaldaý jáne basqa da ilespe shyǵys kiredi», dedi Á.Maǵaýov.
Energetıka mınıstrliginiń deregi boıynsha Qazaqstanda benzınniń ortasha baǵasy – 160 teńge.
