Ekspozısııaǵa Germanııa, Fransııa jáne Gollandııa sýretshileri Albreht Dıýrer, Jak Kallo, Rembrandt Van Reın, Antonı Vaterlo, Iаn Lıvens syndy belgili qylqalam sheberleriniń 100-den astam týyndysy qoıylǵan. Jahandyq álemdi qurý jolyndaǵy betburys kezeńi dep atalǵan 16-17 ǵasyr álemdik tarıhtyń mańyzdy kezeńi sanalady. Dál sol jyldardan bastap grafıkanyń ofort dep atalatyn túri baspa grafıkasynyń tanymdyq, ǵylymı jáne dinı mazmundaǵy sýretterin taratatyn yńǵaıly ári arzan qural retinde qoldanyla bastady.
Kórmege fransýz grafıka mektebin tanystyratyn XVII ǵasyrdaǵy kórnekti sheber, óziniń zamandas sýretshilerine, olardyń arasynda áıgili Rembrandtqa eleýli yqpal jasaǵan Jak Kallonyń (1592-1635) týyndylary qoıyldy. Kallonyń «Soǵystyń kishi apattary» (1632) jáne «Soǵystyń úlken apattary» (1634) toptamalary fransýz áskeriniń onyń týǵan Lotarıngııasyn basyp alǵan qaıǵyly kórinisinen týǵan. Onyń kompozısııalarynan zorlyq-zombylyq pen soǵysqa degen narazylyq úni estiledi.
Ekspozısııanyń negizgi bóligin týyndylary álemdik beıneleý ónerinde úzdik túpnusqa bolyp sanalatyn kórnekti golland sýretshisi Rembrandt Van Reınniń (1606-1669) túpnusqa týyndylarynan jasalǵan oforttary alady. Mýzeıge áıgili orys kolleksıoneri ári sýretshisi, Rembrandtyń shyǵarmashylyǵyn asa súıýshi N. Mosolovtyń (1847-1914) kolleksııasynan túsken bul grafıkalyq týyndylar uly sheberdiń jaýharlarynyń erekshelikterin jetkizýde oryndaý sheberligimen jáne asqan dáldigimen dara tur. Eksponattardyń arasynan Rembrandtyń «Kıeli otbasy» (1645), «Túngi baqylaý» (1642), «Adasqan uldyń oralýy», «Danaıa» syndy belgili kartınalarynyń oforttaryn kórýge bolady. Osy kórmege qoıylǵan týyndylardyń ishinen onyń erterektegi «leıden» kezeńinde oryndalǵan Rembrandtyń «Qaıyrshy» (1630) kompozısııasy erekshe qyzyqtyrady. «Adamnyń syrtqy kelbetin túzetýge qanaǵattanbaıtyn, biraq onyń ishki jaǵdaıyn anyqtaýǵa tyrysatyn» (E.Levıtın) Rembrandttyń kólemi shaǵyn oforty onyń sýretker retinde joǵary sheberligin kórsetedi.
Kórermen úshin uly golland sýretshisiniń shyǵarmashylyǵyna arnalǵan ár jyldardaǵy sırek kitap basylymdaryn tamashalaýdyń taptyrmas múmkindigi týyp otyr. Ekspozısııanyń atalǵan bólimimen – Á.Qasteev atyndaǵy Memlekettik óner mýzeıiniń kitaphana qoryndaǵy biregeı jıınaqtama aıasynda da tanysýǵa bolady.
