Senatorlar Palatanyń aldaǵy otyrysynda «2005 jylǵy 25 qarashadaǵy Táýelsiz Memleketter Dostastyǵyna qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaıtarýdy qamtamasyz etýdegi yntymaqtastyǵy týraly kelisimge ózgerister engizý týraly hattamany ratıfıkasııalaý týraly» zań jobasyn qaraıdy.
Bul qujat ratıfıkasııalanǵanda bizdiń elimizge TMD elderiniń aqparattyq derekqorlarynan avtokólik týraly málimetterdi jedel alýǵa múmkindik týady. Sondaı-aq biryńǵaı aqparattyq baza arqyly málimet almasý júzege asady, onda avtokóliktiń esepten shyǵarylǵany, memlekettik shekarany kesip ótkeni, zaqymdary jáne t.b. aqparat salynatyn bolady. Osylaısha, TMD-ǵa qatysýshy elderdiń avtokólik urlyǵyna qarsy kúres jáne olardy qaıtarýdy qamtamasyz etý boıynsha birlesken is-qımyldary kúsheıe túsedi.
Senat depýtattary sondaı-aq «Eýrazııalyq ekonomıkalyq odaqqa múshe memleketterdiń temeki ónimderine aksızder salasyndaǵy salyq saıasatyn júrgizý qaǵıdattary týraly kelisimdi ratıfıkasııalaý týraly» zań jobasyn da talqyǵa salady.
Otyrystyń kún tártibine sondaı-aq eki shart - «Qazaqstan Respýblıkasy men Bolgarııa Respýblıkasy arasyndaǵy sottalǵan adamdardy berý týraly shartty ratıfıkasııalaý týraly» jáne "Eýrazııalyq ekonomıkalyq odaqtyń taýar belgileri, qyzmet kórsetý belgileri jáne taýarlar shyǵarylǵan jerlerdiń ataýlary týraly shartty ratıfıkasııalaý týraly" zań jobalary da engizildi.
Senatorlar sonymen qatar «Jahandaný dáýirinde ulttyq qundylyqtardy dáripteý – rýhanı jańǵyrýdyń negizi» taqyryby boıynsha parlamenttik tyńdaýǵa daıyndyq máselelerin de talqylady.
Bıýro otyrysy barysynda Májilisten kelip túsken birqatar zań jobalary Senattyń turaqty komıtetterine bólinip berildi.
