Ál-Farabı atyndaǵy QazUÝ-niń úsh ǵylymı jýrnaly, atap aıtqanda «Hımııa», «Fızıka» jáne «Matematıka, mehanıka jáne ınformatıka» habarshy serııalary Web of Science málimetter bazasynyń ındeksteý tizimine qosyldy.
Bul ýaqytqa deıin osy málimetter bazasynda «International Journal of Mathematics and Physics», «International Journal of Biology and Chemistry», sondaı-aq ál-Farabı atyndaǵy QazUÝ-men birlesip shyǵarylatyn «Eurasian Chemico-Technological Journal» jáne «QR UǴA Habarshysy. Fızıka jáne matematıka serııasy» jýrnaldary bolǵan.
Russian Science Citation Index (RSCI) – bul ǵylymı basylymdardyń kóp salaly derekqory jáne ol Web of Science-ke engizilgen zertteý nátıjeleriniń álemdik qol jetimdiligin qamtamasyz etedi.
Russian Science Citation Index (RSCI) ındeksiniń derekqoryna ǵylymı jarııalanymdardy qosý úrdisi baǵalaýdyń birneshe kezeńinen turady, sonyń ishinde Reseılik ǵylymı dáıeksózder ındeksindegi (RINS) jýrnaldyń bıblıometrııalyq kórsetkishteri jáne jetekshi ǵalymdarmen basylymnyń ǵylymı saraptamasy qarastyrylady.
RSCI-de mańyzdy ǵylymı qundylyǵy bar eń jaqsy basylymdar jınaqtalǵan. Sondyqtan, ál-Farabı atyndaǵy QazUÝ Habarshysy serııalarynyń Russian Science Citation Index dáıeksóz ındeksine qosylýy, sondaı-aq ǵylymı qaýymdastyq úshin eń bedeldi Web of Science málimetter bazasyndaǵy ýnıversıtettiń 7 jýrnalynyń ındekstelýi ýnıversıtettiń ǵylymı zertteýler men ǵylymı jarııalanymdar sapasyn arttyrý strategııasynyń sátti ekendigin taǵy bir ret dáleldeıdi.
