Transparenttilik transformasııasy

«Adaldyq alańy» jobasynyń júzege asyrylý barysymen tanystyryp ótken agenttik ókili turmystyq jemqorlyqty joıýdy maqsat tutqan bastamanyń bas­ty mindeti qyzmet kórsetýde halyqqa qo­laıly jaǵdaı jasaý ekenin atap ótti.

Elbasy Nursultan Nazarbaev «Sy­baı­las jemqorlyqtan ada óńirler» jobasy aıasynda sybaılas jemqorlyqqa qarsy strategııany iske asyrý kezinde aımaqtarǵa elorda tájirıbesin keńinen taratýdy usynǵan bolatyn. Al bul jo­banyń memlekettik organdardyń ashyq­tyǵyn qamtamasyz etý, sybaılas jemqorlyqqa qarsy mádenıetti qa­lyp­tastyrý jáne qoǵamdyq baqylaý qu­ral­daryn kúsheıtý mindetterin dál osy servıstik format, front-ofıster men oýpen-speısterdiń arqasynda jú­zege asyrý kózdelip otyr.

Departament dırektorynyń málim­deýin­she, qazirgi tańda «Adaldyq ala­ńy» jobalyq keńsesi elimizdiń 19 orta­­lyq memlekettik organy men 17 óńir­de, «Samuryq-Qazyna» AQ men onyń enshiles uıymdarynda jumys isteıdi. Basshylary qoǵam ókilderinen taǵaıyn­dal­ǵan bul keńselerde qarapaıym ha­lyq­qa qyzmet kórsetýge qolaıly jaǵ­daı jasalǵan, eń bastysy, memleket­tik qyz­metter elektrondy nusqada kórse­tiledi.

Joba memlekettik qyzmetterdi sıfr­lan­dyrýǵa aıtarlyqtaı serpin ber­gen. Qazirgi tańda bul kórsetkish 93 paıyzǵa jetken. Osyǵan oraı elimiz BUU-nyń elektrondy úkimetti damytýdyń álemdik reıtınginde 29-orynǵa taban tirese, Elektrondy qatysý ındeksi bo­ıynsha  26-orynǵa kóterilgen.

Bul rette Ǵ.Asanuly IQALA jáne I-KOMEK 109 monıtorıng jáne jedel áreket etý ortalyqtarynyń qyzmetterin atap ótti. Qalalyq qyzmetter men óńir­lerdegi jer máseleleri boıynsha geoaq­parattyq júıeler júktelgen bul orta­lyq­tar arqyly kez kelgen turǵyn ózine kerek qyzmetti kedergisiz ala alady.

Qala, aýdan, aýyldyq ákimdikterdi servıstik úlgige kóshirý sybaılas jem­­qorlyqqa qarsy is-qımylǵa tyń ser­­pin bergen. Qazirgi tańda elimizde 320-dan astam ákimdik osy formatta jumys isteýge kóshken. Bul – ob­lys­tyq mańyzy bar qala men aýdandar júz paıyz qamtyldy degen sóz. Jer­gilik­ti ákimdikter men «Adaldyq alańy» jobalyq keńseleriniń úılesimdi jumy­sy­nyń arqasynda barlyq eldi mekenderde ózine-ózi qyzmet kórsetý buryshtary ashylǵan.

Osylaısha búginde memlekettik organdar men mekemelerde 2500-ge jýyq kedergisiz front-ofıs pen oýpen-speıs ashylyp, sonyń arqasynda memlekettik mekemelerde halyqqa kórsetiletin qyz­metterdi alý prosesi jeńildetilgen. Mundaı keńselerde azamattarǵa ózek­ti máseleleri boıynsha aqparat alý qol­jetimdi ári jan-jaqty keńes te beriledi. Memlekettik bilim berý jáne densaýlyq saqtaý mekemeleriniń 5,5 myń­nan astam birinshi basshysy yń­ǵaıly kabınetterinen shyǵyp, birinshi qabattaǵy «áınek kabınetterde» jumys isteýge kóshken. Osylaısha basshylar da qoljetimdi boldy. Bir sózben aıtqanda, elimizde basty kórsetkishteri – ashyqtyq pen transparenttilik bolyp tabylatyn memlekettik qyzmetshilerdiń jańa jumys isteý transformasııasy bastaldy.

Agenttiktiń bul baǵytta jaı úılesti­rý­shi ǵana emes, ózi naǵyz úlgi bolý qajet­tigin atap ótken departament dırektory: «17 óńirde agenttiktiń servıstik orta­ly­ǵy ashylyp, bul alańdarda sybaılas jemqorlyqqa qarsy bastamalardyń «fab­rı­kalaryna» aınalǵan kovorkıng ortalyqtar jumys isteıdi. Osyǵan uqsas servıstik «Antıkor ortalyǵy» agenttik apparatynyń da janynda ashyldy», dep atap ótti.

Joba aıasynda halyqqa konsýlta­sııa­lyq qoldaý júıesi de oń jolǵa qo­ıylǵan. Bul turǵyda kún saıyn ótkizi­letin turaqty tikeleı efırler – «Adal kómek» jáne Antikor.live jobalaryn atap ótýge bolady. Azamattardy qabyldaý arqyly máseleniń túıinin sheshýdi dástúrge aınaldyrǵan «Adaldyq alańyna» ótken jyly 12 myńǵa jýyq ótinish kelip túskenin málimdegen Ǵ.Asanuly bul aryz-shaǵymdardyń 80 paıyzy sheshimin tapqanyn da aıtty.

Jobadan jalpyulttyq qozǵalysqa ulasqan «Adaldyq alańynyń» elimizdegi qoǵamdyq baqylaýdyń draıverine aı­nal­ǵandyǵynyń taǵy bir kórsetkishi – jem­qorlyqqa qarsy qozǵalysqa jı­nal­ǵan 80 myńnan astam volonter. «Qo­ǵamdaǵy kez kelgen ózekti máselege beıjaı qaramaıtyn azamattardyń arqasynda 300 dári-dármekti alyp-satýdyń joly kesilip, gýmanıtarlyq kómek retindegi 18,3 mln qorǵanysh quraly, 3,1 mln dárilik zat, 428 myń medısınalyq jabdyq tıisti oryndarǵa jetkizildi. Kompıýterler satyp alý kezinde 1,5 mlrd teńgeden astam qarajat únemdelip, UBT-daǵy 3 myńǵa jýyq qatysýshynyń nátıjeleri joıyldy», dep málimdedi ol.

Qoǵamdyq baqylaýdyń taǵy bir pármendi tetigi – «Ashyq bıýdjetterdiń ınteraktıvti kartasy». Agenttik jalpy somasy 14,3 trln teńgeni quraıtyn 18 myńǵa jýyq memlekettik mekemeniń qarjylyq deregi ornalastyrylǵan kartany damytý maqsatynda «Ashyq bıýdjet» jańa jobasyn iske qosqan bolatyn. Mundaǵy basty maqsat – bıýdjet qarajatyn ıgerý monıtorıngine azamattardy keńinen tartý jáne halyqtyń qarjylyq saýattylyǵyn arttyrý.