Sonymen dúısenbide qalada 342 adamnyń indet juqtyrǵany anyqtalsa, seısenbi kúngi epıdemııalyq ahýalǵa sáıkes ınfeksııa taǵy da 297 turǵynnan tabylyp otyr.
Indettiń qaıta bas kóterýine baılanysty qoǵamdyq densaýlyq saqtaý basqarmasynyń basshysy Narıman Tabynbaev jýrnalıster saýaldaryna jaýap berdi. BAQ ókilderin aýrýhanalar men dárihanalardy dári-dármekpen qamtamasyz etýden bastap, ushaqtan aman qalǵandardyń densaýlyǵy, indet juqtyrǵandardy emdeý, aýrýhanaǵa jatýdan bas tartqan turǵyndar máselesi tolǵandyrady.
«Jańa jylǵa deıin kovıdti naýqasty emdeý úshin kún saıyn baǵa qubylyp turdy. Qazirgi ýaqytta Qoǵamdyq densaýlyq saqtaý basqarmasy tarıfterdi anyqtady. Koronavırýs ınfeksııasynyń aýyr túrimen aýyratyn bir naýqasty emdeýge 930 myń teńgeden astam qarajat bólinedi. Hali ortasha pasıentterdi emdeýge shamamen 450 myń teńge jumsalady. Árbir naýqastyń jaǵdaıy belgilengen tarıftik mólsherlememen qaralady. Búgingi tańda Densaýlyq saqtaý mınıstrligi bólgen qarajat koronavırýs ınfeksııasymen aýyratyn naýqastarǵa tolyqtaı jetedi. Oǵan dári-dármekter, dárigerlerdiń, medbıkelerdiń jalaqysy jáne barlyq qurylǵylardyń jabdyqtary kiredi», dedi N.Tabynbaev.
«Pandemııa bastalǵan kezde Almatyda 500 tósektik oryn ǵana bar edi. 2 ınfeksııalyq stasıonar jumys istedi. Al 2020 jyldyń shilde aıynda Almatynyń 27 birdeı medısınalyq uıymy KVI-men aýyratyn naýqastarǵa stasıonarlyq kómek kórsetti. Sonymen qatar, Qoǵamdyq densaýlyq saqtaý basqarmasynyń sheshimimen 280 tósektik orynǵa arnalǵan I.Jekenov atyndaǵy modýldik klınıkalyq juqpaly aýrýlar aýrýhanasy, sodan keıin 300 orynǵa arnalǵan Balalar qalalyq modýldik klınıkalyq juqpaly aýrýlar aýrýhanasy jáne 500 oryndy RV-90 ınfeksııalyq aýrýhanasynyń ekinshi fılıaly paıdalanýǵa berildi», deıdi Almatynyń bas dárigeri.
13 naýqastyń hali óte nashar
Sońǵy málimetterge sáıkes stasıonarlarda 1 239 adam (onyń ishinde 64 bala) emdelip jatyr. Eresek 13 naýqastyń jaǵdaıy óte aýyr. Byltyr Almatyda koronavırýs ınfeksııasymen kúres aıasynda KVI jáne pnevmonııamen aýyratyn naýqastardy qabyldaý úshin jetkilikti oryn qory jasaqtalǵan bolatyn. Bastapqy medısınalyq-sanıtarlyq kómek deńgeıinde 298 mobıldi brıgada quryldy, onda 948 qyzmetker jumys isteıdi. Búgingi kúni qala boıynsha 7 011 ınfeksııalyq oryn, onyń ishinde 250 reanımasııalyq oryn bar.
– KVI jáne pnevmonııamen aýyrǵan pasıentterdi emdeıtin uıymdar medısınalyq ottegimen 100% qamtamasyz etilgen. 6 stasıonarda ottegi gazdandyrý stansalary salyndy, biz taǵy 12 stansany paıdalanýǵa berýge daıyndap jatyrmyz. Osylaısha, 1 deńgeıli ınfeksııalyq aýrýhanalardyń jansaqtaý jáne reanımasııa bólimshelerin ottegi jabdyqtarymen tolyq qamtamasyz etý júzege asyryldy. Konservasııada aýyrlyǵy jeńil dárejedegi pasıentterdi emdeý úshin syıymdylyǵy 1000 pasıentke deıin qaıta jabdyqtalǵan «Halyq Arena» sport kesheni ornalasqan, – dedi N.Tabynbaev.
Ekpe bıýdjet esebinen salynady
Almatyda aqpan aıynda 10 myńǵa jýyq maman vaksına alǵan. N.Tabynbaev sáýirde koronavırýsqa qarsy ekpeniń 30 myń dozasy qoljetimdi bolǵan kezde ekpe alatyndardyń tizimi kóbeıetindigin atap ótti. Aldymen sozylmaly keselderi bar – júrek, qan tamyrlary jáne baýyr aýrýy boıynsha dıspanserlik esepte turǵandarǵa vaksına salynady. Qala jetkilikti túrde ekpemen qamtamasyz etilse, turǵyndardy jappaı vaksınalaý qolǵa alynady.
«Taıaý ýaqytta ózimizdiń otandyq vaksınany da koronavırýsqa qarsy qoldanamyz. Sondaı-aq Úkimet tarapynan qytaılyq jáne amerıkalyq vaksınany elge ákelý máselesi talqylanyp jatyr. Qazir kelissózder júrgizilýde. Biz osy ekpege úlken úmit artyp otyrmyz. Halyqty barynsha jappaı ekpemen qamtamasyz etsek, indettiń taralýyn barynsha tejeýge múmkindigimiz bar. Sondyqtan, jalpy halyqty vaksınalaý máselesi biz úshin óte ózekti», dedi N.Tabynbaev.
Qalanyń bas dárigeri Almatyda aqpanda 1 750 medısına qyzmetkeri egilip, barlyǵy da qaıta vaksınalaýdan ótkenin aıtty. Al ekinshi kezeń 2021 jyldyń 1 naýryzynda bastaldy. Bul kezeńge Spýtnık V vaksınasynyń qosymsha 10 800 dozasy alyndy. Qazirgi tańda
6 550 adamǵa ekpe salynsa, olardyń 60 paıyzy – «qaýipti aımaqta» jumys isteıtin medısına qyzmetkerleri, 18 paıyzy – ustazdar, 12 paıyzy – quqyq qorǵaý organdarynyń qyzmetkerleri.
Aıta ketelik, koronavırýsqa qarsy ekpe memlekettik bıýdjet esebinen júrgiziledi.
ALMATY
