Qyzylordadaǵy kásipkerler palatasy osy saladaǵy iskerler arasynda saýalnama júrgizip, istiń alǵa basýyna kedergi bolyp otyrǵan birqatar máseleni anyqtady. Problemanyń kóbi pandemııaǵa baılanysty shekteý sharalarynan týyp otyr.
– Degenmen, munyń biz úshin tıimdi tustary da bar. Qazir shet memleketterdiń kóbi shekteý sharalaryn qatańdatýda. Bul bizge ishki týrızmdi kóterýge jaqsy múmkindik beredi, – deıdi oblystyq kásipkerler palatasynyń dırektory Ǵalymbek Jaqsylyqov. – Bul úshin, árıne, sheteldiń servısine jetpese de jurt kóńilinen shyǵardaı jaǵdaı jasaýymyz kerek. Jasyratyny joq, qoly qalt ete qalsa qyzylordalyqtar demalýǵa kórshi oblystarǵa ketip jatady. Bul jerde olardy kinálaýdyń qajeti joq. Tek negizgi problemany anyqtaý kerek. Bizde ınfraqurylymdy jetildirý, nasıhat jumystaryn jandandyrý áli jolǵa qoıylmaı keledi. Tipti 2020-2021 jyldarǵa týrızmdi damytýǵa oblysta qarjy qarastyrylmaǵany da osy salaǵa degen kózqarasymyzdy tanytsa kerek.
Kásipkerler palatasynyń dırektory ózge óńirlerdegi jaǵdaıdy saralap, kórshiles Shymkent qalasynda byltyr týrızmdi damytýǵa – 125,7, al Almatyda – 51,3, Almaty oblysynda 29,4 mln teńge bólingenin atap ótti. Bul baǵyttaǵy memlekettik satyp alý týrızm basqarmalary arqyly júzege asyrylǵan. Qarajattyń deni aqparattyq-ımıdjdik qoldaý, beınerolıkter men jarnamalyq rolıkter, kádesyılar, atrıbýttar, polıgrafııa ónimderin shyǵarý, aqparattyq dúńgirshek satyp alý, ekskýrsııalyq qyzmetterdi uıymdastyrýǵa jumsalypty. Munan ózge, jyl basynan beri Shymkent qalasynda týrızmdi nasıhattaýǵa arnalǵan qyzmetterge memlekettik tapsyrys jarııalanyp, bul baǵytta jumys bastalyp ketken.
Syr óńiriniń geografııalyq jaǵdaıy, klımaty da týrızmge qolaıly. Talaı tarıhty qoınaýyna jasyrǵan aımaqtaǵy mádenı-tarıhı muralar da salany damytýǵa suranyp-aq tur. Osy kúni respýblıkalyq týrıstik kartaǵa oblystan Qamystybas kóli, Jańaqorǵan shıpajaıy jáne Baıqońyr týrıstik aımaǵy enip otyr. Nıet bolsa, mundaı nysandar qataryn kóbeıte túsýge bolady. Palata dırektory bul usynystaryn aımaq basshylyǵyna da jetkizipti.
– Eń áýeli bıylǵa arnalǵan Jumyspen qamtýdyń jol kartasy aıasynda atqarylatyn jumystar tizimine týrıstik nysandardy ınfraqurylymmen qamtamasyz etý jobasyn qosýdy surap otyrmyz. Byltyr osy baǵdarlama sheńberinde oblys boıynsha quny 40 mlrd teńge bolatyn 291 joba júzege asyrylypty. Alaıda ishinde týrızm ınfraqurylymyna qatysty birde-bir joba joq, – deıdi Ǵ.Jaqsylyqov.
Palata týrızmdi damytý is-sharalaryn qarjylandyrýǵa jergilikti bıýdjetten qarajat qarastyrýdy, úkimettik emes uıymdardy tarta otyryp, memlekettik áleýmettik tapsyrys arqyly salany damytatyn jobalardy júzege asyrýdy, «Qyzylorda» óńirlik ınvestısııalyq ortalyǵy arqyly jobalardy nesıelendirýge arnaıy qarajat bólýdi usynyp otyr.
Kásipkerler arasynda oblys ortalyǵy mańyndaǵy saıajaılarda, kólder jaǵalaýynda demalys aımaqtaryn ashýǵa talap qylǵandar az emes. Biraq kópshiligi tańdaǵan jeriniń ornalasýyna baılanysty nesıe ala almaı otyr. Al palata usynysy júzege asyp jatsa, eń aldymen, osylardyń isi alǵa baspaq.
Qyzylorda oblysy
