Eskertkishtiń saltanatty ashylý rásimine Memlekettik hatshy Qyrymbek Kósherbaev, Mádenıet jáne sport mınıstri Aqtoty Raıymqulova men Almaty qalasynyń ákimi Baqytjan Saǵyntaev qatysty.
Saltanatty jıyn barysynda Memlekettik hatshy Prezıdent Qasym-Jomart Toqaevtyń halyq jazýshysy eskertkishiniń ashylýyna baılanysty arnaıy hatyn oqyp berdi.
«Halqymyz «Geraǵa» dep qurmet tutqan Gerold Karlovıch sanaly ǵumyrynda ultymyzdyń ádebıeti men mádenıetin órkendetýge, qazaq tiliniń qaryshtap damýyna aıryqsha úles qosty. Bala shaqtan dala demokratııasyn boıyna sińirip ósken qarymdy qalamger ult rýhanııatyndaǵy ótkir de ózekti máselelerdi de árdaıym búkpesiz aıtyp, qoǵamda talqylap, olardy sheshý joldaryn usynyp otyrdy. Eń bastysy, jazýshy Gerold Belger óziniń ómiri men óneri arqyly birligi jarasqan birtutas Qazaqstan halqyn qalyptastyrý isine qaltqysyz qyzmet etti», delingen Memleket basshysynyń arnaıy hatynda.
О́z kezeginde Memlekettik hatshy qazaq aýylynda shynaıy dostyq pen jan jylýy ortasynda tárbıelengen «Geraǵa» qazaq halqynyń tiline, diline, mádenıeti men ónerine degen shynaıy qamqorlyǵy men qurmetin ómiriniń sońyna deıin saqtaǵanyn atap ótti.
«Onyń shyǵarmashylyǵy óskeleń urpaqty rýhanı nárlendiretin ómirlik danalyqtyń qazynasyna aınaldy. Búgin biz táýelsiz Qazaqstannyń rýhanı jańǵyrýynyń ıgiligine arnaǵan qajyrly eńbegi men asyl júregi úshin halqymyzdyń kórnekti ulyna qurmet kórsetemiz», dedi Memlekettik hatshy.
Qyrymbek Kósherbaev eskertkishti ázirleý jáne ashý jumystaryn júrgizgeni úshin músinshi Nurlan Dambaıǵa, mesenat Nurlan Smaǵulovqa jáne basqa da osy ıgi iske atsalysqan azamattarǵa alǵys bildirdi. Sonymen qatar saltanatty rásimge Asyly Osman, Ahmetjan Ashırı, Rýben Andrıasıan, Iýrıı Aravın, Ermek Tursynov jáne ózge de mádenıet jáne óner qaıratkerleri qatysty.
Memlekettik hatshy jumys sapary barysynda Ulttyq Ǵylym akademııasynda bolyp, Bilim jáne ǵylym mınıstrligi ókilderimen birge ǵylymdy damytý máselesi boıynsha keńes ótkizdi. Jıynnan keıin Qyrymbek Kósherbaev Mádenıet jáne sport mınıstrligi, «Qazaqfılm» aksıonerlik qoǵamy jáne Ulttyq kınony qoldaý ortalyǵynyń basshylyǵymen tarıhı fılmderdi túsirý jobalaryn talqylady.
