Qoǵamdyq tamaqtaný nysandarynyń qyzmeti keshki saǵat 10-ǵa deıin qysqardy. Senbi jáne jeksenbi kúnderine kelmeıtin mereke kúnderi bazarlar men saýda ortalyqtary shtattyq rejımde jumys isteıtin bolady.
«Sońǵy aptada, aldyńǵymen salystyrǵanda, BQO - da syrqattanýshylyq 1,4% - ǵa artqany baıqalady. Eń osal top burynǵysynsha jumys isteıtin halyq pen zeınetkerler. Barlyq anyqtalǵan jaǵdaılardyń ishinde otbasynda buryn syrqattanǵan adamdarmen qarym – qatynas jasaý – 33,8%, adamdar kóp jınalatyn oryndarǵa barý (saýda úıleri, bazarlar, medısınalyq uıymdar) - 27,7%, qoǵamdyq kólikte júrý – 26,4%, sondaı-aq estelik is-sharalarǵa barý (eske alý túski asy, mereıtoılar, úılený toılary) - 7,9% juqtyrý kózderi bolyp tabylady. Sońǵy kúnderi táýligine syrqattanǵandar sany artyp, 81 jaǵdaıǵa jetti, nátıjesinde BQO taǵy da "qyzyl" aımaqta boldy. Osyǵan baılanysty demalys kúnderi lokdaýn engizildi», dep habarlady oblystyń bas sanıtarlyq dárigeri Muhametǵalı Aryspaev.
Oqýshylarǵa keletin bolsaq, úshinshi toqsanda (11 qańtardan bastap) koronavırýsty juqtyrýdyń 353 jaǵdaıy tirkeldi. 4-18 naýryz aralyǵynda 19 mektepte 31 synyp karantınge jabyldy.
«Qazir dástúrli formatta oqýshylar kontıngenti 300 oqýshyǵa deıin, synyptardaǵy balalar sany 15 adamǵa deıin qalalyq jáne aýyldyq mektepterde, sondaı - aq kezekshi toptarda 1 - den 5 - synypqa deıin jáne aralas (pánderdiń 70% - y shtattyq rejımde, 30% - y dıstasııalyq rejımde) 9, 11-synyptar úshin aptanyń alty kúni boıy oqytýǵa ruqsat etildi. Alaıda shekteý is-sharalarynyń rejımi men merzimderi oblys aýmaǵynda koronavırýstyq ınfeksııanyń taralýy boıynsha jaǵdaıdyń ózgerýine sáıkes qaıta qaralýy múmkin. 20 naýryzdan 1 sáýirge deıin oqýshylar demalysqa ketetini belgili. Eger sáýir aıynda BQO «sary» nemese «jasyl» aımaqta bolsa, oqytý ádettegi rejımde jalǵasady. Eger jaǵydaı qolaısyz bolsa, rejımdi kúsheıtýge týra keledi jáne mektep prosesi qaıtadan onlaın oqytý formatyna aýysýy múmkin», dep túsindirdi M.Aryspaev.
BQO densaýlyq saqtaý basqarmasy basshysynyń orynbasary Gúlnar Abdrahmanovanyń aıtýynsha, sońǵy málimetter boıynsha Infeksııalyq stasıonarlardyń toltyrylýy 46% - dy quraıdy. 62 reanımasııalyq tósekte 12 pasıent em alady. Negizinen bul 60-70 jastan asqan azamattar.
«BQO-da vaksınalaý keste boıynsha jalǵasýda. О́zderińiz biletindeı, birinshi kezekte vaksınany medısına qyzmetkerleri, sondaı-aq pedagogtar men kúsh qurylymdarynyń qyzmetkerleri alady. Mysaly, birinshi komponentti 660 muǵalim engizdi», dedi Ǵ.Ábdirahmanova.
SEQ jáne oblystyq densaýlyq saqtaý departamentteriniń ókilderi halyqty barlyq qajetti qorǵaý sharalaryn saqtaýǵa shaqyrdy. Olardyń aıtýynsha sońǵy ýaqytta naýqastar aýrýdyń aýyr jáne óte aýyr túrimen ınfeksııalyq stasıonarlarǵa kelip túsýde. Ásirese, arterııalyq gıpertenzııasy, qant dıabeti, júrektiń ıshemııalyq aýrýy bar egde jáne kárilik jastaǵy adamdarda aýrý óte ótkir.
