Birlik pen tatýlyq meıramy

Memleket basshysy Qasym-Jomart Toqaev «Táýelsizdik bárinen qymbat» maqalasynda Naýryz meıramyn atap ótý tujyrymdamasyn jasap, kóktem merekesiniń mazmunyn baıyta túsken jón ekenin aıtqan bolatyn. Osyǵan oraı, «Ejelgi Taraz eskertkishteri» memlekettik tarıhı-mádenı qoryq-mýzeıiniń uıymdastyrýymen Jambyl oblystyq tarıhı-ólketaný mýzeıinde «Amal keldi – jyl keldi» atty shara ótti. Mádenı shara barysynda kóp­shi­lik ulttyq naqyshtaǵy kıimderin kıip, qoldaryna ulttyq taǵamdarymyz ben baýyrsaq, táttilerin alyp, Kenen Ázirbaev atyndaǵy oblystyq fılarmonııa ánshileriniń súıemeldeýimen «Gúl-gúl jaına» halyq ánin shyr­qap, tarıhı-ólketaný mýzeıine bet aldy. Atalǵan merekelik sharany elimiz­ge belgili óner ıeleri «Taraz trıosy» án salyp ashyp berdi. Munda kópshilik bir-birimen amandyqta qaýyshyp, merekeniń máni men maǵynasyna keńinen toqtaldy. Al «Ejelgi Taraz eskertkishteri» memlekettik tarıhı-mádenı qoryq-mýzeıiniń dırektory Nurlan Byqybaev jınalǵandar­dy Amal merekesimen quttyqtap, mun­daı merekelerdiń bolashaq urpaqqa úlgi bolyp qalýyna barlyq azamat­tyń atsalysýy kerektigin jetkizdi. Án men jyrdan shashý shashylyp, kópshilik bir-birine «Jasyń qutty bolsyn!», «Jasyńa jas qosylsyn!» degen tilekterin aıtty. Sonymen qatar Asqar Toqpanov atyndaǵy oblystyq qazaq drama teatrynyń akterleri Amal merekesine baılanysty kóri­nis qoıyp, merekelik sharanyń ajaryn ashty. Qydyr baba eldiń aman­dyǵyn tilep, aq batasyn berdi. Bul rette oblystyq tarıhı-ólketaný mýzeıi­niń dırektory Seıitjan Ilııas kel­gen­derge alǵys aıtyp, jyly lebizin bildirdi. «Mundaı mere­kelerdiń mánin joǵaltpaý kerek. Aýyz­birshilik pen kishipeıildilikke, tatýlyq pen baýyrmaldyqqa, izettilik pen meıirimdilikke bastaıtyn, salt-dástúrimiz ben ádet-ǵuryptarymyzdy ulyqtaıtyn mundaı merekelerdiń atalyp ótýi óskeleń urpaqqa úlgi bolary sózsiz», deıdi «Ejelgi Taraz eskertkishteri» memlekettik tarıhı-mádenı qoryq-mýzeıiniń ǵylymı qyzmetkeri Láılá Tileýberdiqyzy.

Jambyl oblysy