Áskerlerdiń qolbasshylary bıylǵy oqý-jattyǵýlarda qazirgi zamanǵy qarýly qaqtyǵystar tájirıbesi eskerilip, jańa urys ádisteri qoldanylǵany týraly baıandady.
Sonyń biri retinde naýryz aıynyń basynda alǵash ret eki jaqty formatta uıymdastyrylǵan «Mátibulaq» polıgonynda ótken brıgadalyq taktıkalyq oqý-jattyǵýyn aıtýǵa bolady. Osyndaı oqý-jattyǵý komandırlerdi jaýyngerlik is-qımyldarda qalyptan tys ádisterdi josparlaýǵa, ýaqytyly urys jaǵdaıyn ózgertýge áreket etýge jáne baǵynysty bólimshelerdiń is-qımylyna qajetti ózgerister engizýge úıretedi. Eki jaqty oqý-jattyǵý óziniń tıimdiligin kórsetti. Aldaǵy ýaqytta aýqymdy qoldanylatyn bolady.
Qorǵanys mınıstri «Ile» polıgonynda bólimshelerdiń ótken jyldan bastap áskerlerdiń jaýyngerlik daıarlyǵyna belsendi engizilip jatqan armııalyq taktıkalyq atys sabaǵyn tekserdi. Desanttyq-shabýyldaý brıgadasynyń komandıri áskerı qyzmetshilerdiń kásibı sheberlikterin shyńdaýda zaman talaptaryn eskere otyryp qarqyndy jaýyngerlik daıarlyq júrgizýge múmkindik beretin oqý-materıaldyq bazasyn kórsetti. Osy jerde mınıstr Armııa halyqaralyq oıyndaryndaǵy «Desanttyq vzvod» saıysyna qatysatyn jaýyngerlerdiń daıarlyǵymen de tanysty.
Qorǵanys vedomstvosynyń basshysy Gvardeısk garnızonynda tank bólimshelerdiń sabaǵyn tekserip, sonymen qatar oqý-jattyǵý alańdarynyń ınfraqurylymyn qarady. Qazirgi ýaqytta ol jerde áskerlerdiń jaýyngerlik jattyǵýlary ótýde, al jazda onda elimizde ótetin Armııa halyqaralyq oıyndarynyń saıystaryn ótkizý josparlanyp otyr.
Tekseris nátıjesi boıynsha general-leıtenant Nurlan Ermekbaev turaqty túrde qarqyndy damyp kele jatqan jaýyngerlik daıarlyqty atap ótip, ony ári qaraı arttyrýda komandırlerge barlyq kúsh-jigerdi jumyldyrýdy tapsyrdy.
