Elbasy Nursultan Nazarbaevtyń tapsyrmasy boıynsha qurylǵan halyqaralyq «TURKISTAN» telearnasy túrkitildes memleketterdiń aqparat keńistiginde 3 tilde habar taratatyn arna bolmaq.
Telearna kún saıyn ózekti aqparattar men qyzyqty baǵdarlamalar, telehıkaıalar men derekti fılmder toptamasyn nazarlaryńyzǵa usynady. Atap aıtqanda, «Salem» tańǵy aqparattyq-saýyqtyq baǵdarlamasy, «Turkistan times» jańalyqtar toptamasy, «Ǵıbrat», «Ápsana», «Jan saraıy», «Betperde» sekildi kórermenge bereri mol baǵdarlamalar da óz kórermenin kútedi.
«Turkistan» telearnasy túrkitildes elder arasyndaǵy aqparat almasý men biregeı ortaq medıa keńistik qalyptastyrýǵa altyn kópir bolady degen úmit bar.
Bul týraly Aqparat jáne qoǵamdyq damý mınıstri Aıda Balaeva da feısbýk paraqshasynda jazdy.
«Munyń bári Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń 2018 jyly Túrkistan qalasyn oblys ortalyǵy retinde bekitý týraly tarıhı sheshiminiń arqasynda múmkin bolyp otyr.
Osy sátten bastap qazaq halqynyń jáne túrki áleminiń rýhanı besigi bolyp tabylatyn qala jańa tarıhtyń sanaýyn bastady.
«Turkistan» telearnasy kórermenderin mazmundy jáne qyzyqty televızııalyq jobalarmen qýanta otyryp, aımaqtyń jańa shejiresin zamanaýı jáne jedel aqparatpen júrgizetinine senimdimin», delingen jazbada.
