«Kóne Taraz» tarıhı-etnomádenı kesheniniń aýmaǵyna kıiz úıler tigilip, onda qolóner buıymdarynyń kórmesi uıymdastyrylyp, jańadan dúnıege kelgen nárestege at qoıý, besikke salý, baılaý, baý taǵar, tusaýkeser salttarynan kórinister qoıyldy. Sonymen qatar, qala kásipkerleriniń ulttyq qolóner buıymdarynyń jármeńkesi ótti.
Sondaı-aq, «Jastar» alleıasynda «Dombra party» aksııasynyń, «Baqytty bala», «Ánshi balapan», «Bala daýsy» jáne taǵy da basqa baıqaýlardyń jeńimpazdary marapattaldy. Ulystyń uly kúni art-kórmeler men sýret salý baıqaýlary da uıymdastyryldy.
Naýryz merekesine oraı, Q.Rysqulbekov saıabaǵynda qumaı tazy, búrkit, gir tasyn kóterý, toǵyzqumalaq, asyq atý, qoı kóterý jáne ózge de ulttyq sport túrinen oıyndar ótse, «Balasaǵun» ortalyq konsert zalynyń aldynda salt-dástúrden teatrlandyrylǵan kórinis qoıyldy. Al, merekelik konserttik baǵdarlamasynyń sheńberinde kıiz úıdegi qolóner kórmesi uıymdastyryldy.
Sonymen qatar, B.Momyshuly atyndaǵy «Jeńis» saıabaǵynda kelýshilerge zamanaýı formattaǵy ulttyq bı kórsetilimi men etnıkalyq stıldegi sán kórsetilimi kórsetildi. Sol sııaqty, kıiz úıdegi qolóner kórmesi de uıymdastyryldy.
Al, «Qazaq halqyna myń alǵys» monýmentiniń aýmaǵynda «Men qazaqsha sóıleımin» aksııasy, etnıkalyq toptar ókilderiniń qatysýymen qazaq tarıhyn, dástúri men ádet-ǵuryptaryn bilýge arnalǵan zııatkerlik vıktorınalar, baıqaý jeńimpazdary marapattaldy. Bul kúni konserttik baǵdarlamamen qatar, kıiz úıdegi qolóner kórmesi de ótti.
Osy syndy merekelik is-sharalar Qazaqstan Respýblıkasynyń Tuńǵysh Prezıdentiniń saıabaǵy, Jambyl polıtehnıkalyq joǵary kolledji, Jambyl medısınalyq joǵary kolledji, №29 orta mektep, №55 orta mektep, «Dańq» alleıasy, «Ulan» stadıony, J.Úshkempirov atyndaǵy «Taraz-Arena» sport saraıy sııaqty oryndarda da uıymdastyryldy.
Taraz qalasynyń aýmaǵynda ornalasqan sport alańdarynda da ulttyq sport túrlerinen jarystar uıymdastyrylyp, jeńimpazdar marapattaldy.
