Muhıttyń arǵy betinde uıymdastyrylyp jatqan asa iri dodada qazaqstandyq sportshylar da baq synaýda. Jarystyń alǵashqy kúninde kortqa shyqqan Zarına Dıas birinshi aınalymda áıgili amerıkalyq tennısshi Vınýs Ýılıamspen kezdesti. Tennıs áleminde apaly-sińlili Vınýs pen Serena Ýılıamsti tanymaıtyn jankúıer kemde-kem shyǵar. Serena «Úlken dýlyǵa» týrnırin 23 ret utsa, Vınýs ta atalǵan týrnırde 10 márte top jarǵan. Áıelder arasyndaǵy álemdik reıtıngte talaı ýaqyt kósh bastaǵan 40 jastaǵy V.Ýılıams áli kúnge deıin tennısten qol úzbeı keledi.
Dese de búginde Vınýstyń bileginen ál kete bastaǵanymen, tennıste jıǵan tájirıbesi mol. Kez kelgen qarsylasty aıla-tásilimen op-ońaı jeńip kete alatyndaı qaýqary bar. Biraq bul joly onyń Zarına Dıasqa shamasy jetpedi. Birinshi sette otandasymyz qarsylasyn esh qıyndyqsyz 6:2 esebimen jeńse, ekinshi sette úlken Ýılıams biraz qarsylasty. 6:6 esebimen tarazy basy teńselip turǵan oıynda Zarınanyń joly boldy. Taı-breıkte 12:10 esebimen basym túsken jerlesimiz 7:6 nátıjesimen jeńisti julyp aldy.
