Telemetrııa derekteri aýytqýlardyń anyqtalǵanyn kýálandyratyn bolsa, jıilik pen qýatty avtomatty retteý júıesine qosylǵan elektr stansalarynyń generasııasyn ózgertýge komanda jiberedi. Júıe otandyq elektr stansalarynyń manevrlik múmkindikterin tıimdi paıdalanýǵa jol ashady. Onyń kirisin arttyrýǵa, sondaı-aq shekaradaǵy Reseıdiń energııa júıesi arasyndaǵy teńgerimsizdikti eki ese azaıtýǵa múmkindik beredi.
«2021 jyly jıilik pen qýatty avtomatty retteý júıesine Ekibastuz GRES-1 stansasy, Moınaq, Buqtyrma, Shúlbi jáne О́skemen gıdroelektr stansalaryn qosý josparlanýda. Bul rette «KEGOC» kompanııasy jıilik pen qýatty avtomatty retteý resýrstarymen qamtamasyz etý jumysyn jalǵastyrýda. Qazirgi ýaqytta retteý júıesine «Topar basty taratýshy energostansasy» JShS jáne «Karabatan Utility Solutions» JShS qosylý jaıy talqylanýda. Sondaı-aq Ortalyq Azııanyń Birikken energojúıesi tarapynan jıilik pen qýatty avtomatty retteý jobasyna qyzyǵýshylyq bar», delingen kompanııanyń resmı habarlamasynda.
Qazaqstanda jıilik pen qýatty avtomatty retteý sııaqty tehnologııalyq jaǵynan kúrdeli jáne tereń ǵylymdy qajet etetin jobalardyń engizilýi sırek kezdesedi. Bul rette júıeni jobalaýdan bastap retke keltirýge jáne iske qosýǵa deıingi barlyq kezeńde otandyq kompanııalar jumyldyrylǵan. Olar – Almaty energetıka jáne baılanys ýnıversıteti, «Qazselenergoproekt» ınstıtýty «Energoınform» AQ jáne «JBR Group» JShS. Sondaı-aq reseılik Energojúıelerdi avtomattandyrý ınstıtýty da atsalysqan.
Kompanııanyń habarlaýynsha, jobadaǵy birlesken jumys qazaqstandyq mamandardyń biregeı quzyretterin damytýǵa yqpal etedi. Bolashaqta bul otandyq kompanııalarǵa shetelderdiń energojúıelerine uqsas sıfrly júıelerdi qurý kezinde kómegin tıgizbek.
Jıilik pen qýatty avtomatty retteý júıesi «Sıfrly Qazaqstan» memlekettik baǵdarlamasy aıasyndaǵy «Birtutas elektr energetıkalyq júıesi rejimderin basqarýdyń apatqa qarsy jáne rejimdik avtomatıkasynyń ortalyqtandyrylǵan júıesin engizý» jobasy sheńberinde engiziledi. Ol paıdalanýǵa engizilgennen bastap, júıelik operatordyń tabysy jylyna 800 mln teńgeni quraýy múmkin.
