Árıne Jer reformasy jónindegi komıssııanyń jumysyna qatysty qoǵamda túrli pikirler aıtylǵanyn jaqsy bilemiz. Qoldaıtyn da, synap-mineıtin de sózderdi qulaǵymyz shalyp jatty. Alaıda kez kelgen jumys nátıjemen ólshenetinin umytpaýymyz qajet. Bul rette atalǵan komıssııa alǵa qoıǵan mindetterdiń birqataryn atqaryp úlgergenin aıtqym keledi.
Bir kezderi qazaq jeriniń shetel azamattaryna uzaq merzimge jalǵa nemese menshikke berilý máselesi – el arasynda dúrbeleń, daý-damaı týǵyzǵany belgili. Osy máselege birjola núkte qoıyldy. Memleket basshysy usynǵan tıisti zań jobasy Parlament Májilisinde qaralyp jatyr. Bul sheshimdi azamattyq qoǵamnyń zor jetistigi dep baǵalaýǵa bolady. Oǵan osy komıssııanyń jemisti jumysy arqyly qol jetkizgenimiz anyq. Naqty nátıje dep otyrǵanymyz – osy.
Soǵan qaramastan, jerge qatysty áli de túıini sheshilmegen túıtkildi máseleler bar. Endi Qazaqstan osy jerdiń taǵdyryn qalaı sheshedi degen másele paıda boldy. Máselen, elimiz jer aýmaǵy boıynsha álemde toǵyzynshy orynǵa turaqtaǵanymen, halyqtyń tyǵyzdyǵy boıynsha kósh sońynda kelemiz. 1 sharshy shaqyrymǵa 6 adamnan ǵana keledi. Bul – álemdegi eń tómen kórsetkishterdiń biri. Al jeme-jemge kelgende otandastarymyzǵa jer jetpeı jatqanyn estımiz. Aınaldyrǵan 10 sotyq jerdiń ózine qol jetkize almaı otyrmyz. Kez kelgen aýyldyń aınalasyndaǵy jerdiń bári báz bireýlerdiń qolynda bolyp shyǵady. Aýyldyqtar sonyń kesirinen jaıylym tappaı zar qaǵyp júr.
Árıne bul Jer reformasy jónindegi komıssııanyń alǵashqy otyrysy ǵana. Sondyqtan bul otyrysta eń aldymen jumys tártibi, reglamenti, uıymdastyrý máseleleri qaraldy. Sondaı-aq birtalaı azamattar sóz sóılep, 50-60-qa jýyq oryndy usynystar aıtyldy. Ashyq áńgime boldy. Eń bastysy, mańyzdy máselelerdiń barlyǵy qoǵammen birlese otyryp sheshiletin bolady.
Rasýl JUMALY,
saıasatker, Jer reformasy jónindegi komıssııa múshesi
