Qalanyń bas memlekettik dárigeri Sarhat Beısenova karantındik sharalardy qatańdatý týraly jańa qaýlyǵa qol qoıdy. Qujatqa sáıkes saýda-oıyn-saýyq ortalyqtaryna, saýda úıleri men saýda ortalyqtaryna demalys kúnderi jumys isteýine tyıym salynady.
«Saýda-oıyn-saýyq ortalyqtarynyń, saýda úıleriniń, saýda ortalyqtarynyń jumysyn kúsheıtilgen sanıtarııalyq-epıdemııaǵa qarsy sanıtarııalyq-profılaktıkalyq is-sharalardy saqtaı otyryp, bir kelýshige 4 m2 esebinen tolymdylyǵyn saqtaǵan kezde jumys kestesin jumys kúnderi saǵat 10:00-den 17:00-ge deıin jáne demalys kúnderi jumysyna tyıym salýmen uıymdastyrý (olarda ornalasqan dárihanalardan, sondaı-aq azyq-túlik pen birinshi qajettiliktegi taýarlardy satatyn mınımarketterden, sýpermarketterden jáne gıpermarketterden, sondaı-aq olardyń qyzmetine osy qaýly boıynsha olardyń ornalasýyna qaramastan ruqsat etilgen obektilerdi qospaǵanda). Bul rette kórsetilgen obektilerde jáne olardyń aýmaqtarynda ornalasqan attraksıondardyń, balalardyń oıyn alańdarynyń, muzdy jáne rolıkti syrǵanaqtardyń, oıyn ortalyqtarynyń jumysyna qatań tyıym salynady», — delingen qaýlyda.
Fýdkorttardyń jumysy shtattyq rejımde tek tamaqty jetkizýge jáne shyǵarýǵa ruqsat etiledi. Al aksııalardyń, jármeńkelerdiń, shoýrýmdardyń, utys oıyndarynyń ártúrli túrlerin ótkizýge tyıym salynady (onlaın formattan basqa).
Jańa qaýly 2021 jylǵy 30 naýryzda kúshine enedi.
Esterińizge sala keteıik, Nur-Sultan 10 naýryzdan bastap epıdemıologııalyq ahýaldy baǵalaý matrısasy boıynsha «qyzyl aımaqta» ornalasqan. Kún saıyn qalada koronavırýstyq ınfeksııanyń 300-den astam jańa jaǵdaıy anyqtalady. Elorda turǵyndary men qonaqtarynan KVI aýrýynyń ósýine jol bermeý úshin sanıtarlyq normalar men karantındik rejım talaptaryn qatań saqtaý talap etiledi.
