Dúıim eldi dúrliktirgen qandy oqıǵa endi qaıtalanbasa deısiń. Aı men kúnniń amanynda úkilep otyrǵan jalǵyz qyzdarynan aıyrylyp qalǵan marqumnyń jaqyndaryn jubatýdyń ózi qıyn. Qoǵamda qyzý talqylanyp jatqan qaıǵyly jaǵdaıdyń qalaı órbigeni týraly Almaty qalalyq polısııa departamentiniń mamandary egjeı-tegjeıli aıtyp berdi.
Boıjetken, jedel-izdestirý sharalary barysynda anyqtalǵandaı, Qonaev kóshesi 43-shi úıde ornalasqan jumys ornynan shyǵyp, taksıge otyrǵan. Beınebaqylaý kamerasy qyzdy sońǵy ret osy kezde túsirip alǵan. Keıinnen málim bolǵandaı, boıjetken sol kúni óziniń jańa tanysymen kezdesýge barǵan. Kúni keshe qandy oqıǵa oryn alǵan Nurkent shaǵyn aýdanyndaǵy kóp qabatty úıdiń kireberisindegi baqylaý kamerasyna Aıajannyń kúdiktimen birge páterge óz erkimen kirgeni jazylǵan jazba jarııalandy.
«20 naýryzda 102 nómirine Aıajan Edilovanyń iz-túzsiz joǵalyp ketý faktisi boıynsha habarlama tústi. Sol sátte atalǵan fakt tergep-tekserýdiń biryńǵaı tizilimine tirkelip, sotqa deıingi tergeý bastaldy. 21 naýryzda arnaıy tergeý toby qurylyp, Aıajan Edilovany izdeý jumystaryna kiristi. 21 naýryzda saǵat 22.00-de Nurkent shaǵyn aýdanynda kúdikti turatyn páter mekenjaıy anyqtaldy. Ol jerge barǵan kezde polısııa qyzmetkerlerine úıdiń esigin buzyp kirýge týra keldi. Tártip saqshylaryn kórgen kúdikti ózine qol salmaq boldy. Jedel járdem shaqyrylyp, aýrýhanaǵa jetkizildi», dep málimdedi polısııanyń baspasóz qyzmeti.
Polısııaǵa óz kinásin moıyndaǵan kúdikti qyzdy 19 naýryzdan 20 naýryzǵa qaraǵan túni óltirgenin aıtqan. Oqıǵa túngi saǵat on eki-bir shamasynda oryn alǵan. Eń soraqysy jábirlenýshiniń denesi bólshektengen kúıi tabyldy. Kúdikti máıitti jasyrý maqsatynda deneniń bir bóligin ózi turatyn Alataý aýdanynan basqa aýdanǵa aparyp, qoqys jáshigine tastaǵan. Qoqys jáshigine tastalǵan dene bólshekterine arnaıy saraptama taǵaıyndaldy.
«Joǵalǵany týraly aqparat túskennen keıin jábirlenýshiniń kimmen baılanysta bolǵany anyqtaldy. Ol kúdiktimen áleýmettik jelide 16 naýryzda tanysqan. Qazir kúdikti er adam aýrýhanada. Ota jasalyp, palataǵa shyǵaryldy. Sottyń sheshimimen qamaýǵa alý týraly bultartpaý sharasy taǵaıyndaldy. Medısınalyq mekemeden shyǵarylǵan soń ýaqytsha ustaý ızolıatoryna qamalady. Málim bolǵandaı, kúdikti men marqum Aıajan Edilova kezdesken kezde ekeýiniń arasynda janjal shyqqan. Janjal kezinde boıjetkendi óltirip, qylmys izin jasyrý maqsatynda kúdikti deneni bólshektegen. Bul asa qatygezdikpen jasalǵan qylmys. Denesiniń keıbir múshesin 19-nan 20-na qaraǵan túni qalanyń ár buryshyndaǵy qoqys jáshikterine laqtyryp úlgergen. Jábirlenýshiniń keıbir músheleri úıden tabyldy. Kúdikti 1993 jyly týǵan Túrkistan oblysynyń týmasy. Buryn sottalmaǵan. Onyń qyzdy qandaı tásilmen úıine shaqyrǵany tergeý barysynda belgili bolady. Qylmystyq kodekstiń 99-babynyń ekinshi bóligi «Adam óltirý» boıynsha is qozǵaldy», deıdi Almaty qalalyq polısııa departamentiniń baspasóz hatshysy Saltanat Ázirbek.
Polısııadaǵylar kúdikti men jábirlenýshi 16 naýryzda jeli arqyly tanysqanyn alǵa tartqanymen, olardyń ekeýara jazbalarynyń mátini saqtalǵan-saqtalmaǵanyn qupııa kúıinde qaldyryp otyr. Jaǵdaıdyń tutas qoǵam nazaryna iligip otyrǵanyn eskersek, kúnderdiń kúni jazba jarııalanar bolsa, jábirlenýshiniń ata-anasyna aýyr soqqy bolýy múmkin.
Qaıǵydan qan jutqan marqumnyń týystary qyzdyń joǵalǵany jóninde erterek dabyl qaǵylsa da, polısııa der kezinde iske kirispedi dep nalyp otyr. Al quqyq qorǵaý qyzmetkerleri qyzdyń joǵalǵany jóninde qońyraý túse sala izdeýdi bastap ketkenderin aıtady.
– Polısııanyń salǵyrttyǵynan bir kúnimizdi joǵalttyq. Osy aralyqta qanisher deneni qasapshy sekildi bólshektep tastaǵan. Kúdiktiniń moıyndaýyna sensek, áýeli óltirip, sosyn jasyrý úshin deneni bólshektegen eken. Biraq sýretti kórgende shoshyp kettik, – deıdi marqumnyń týysy Almat Múlikov. Qarshadaı qyzdy aıýandyqpen azaptap óltirgen qylmysker ólim jazasyna kesilse degen ol kúdikti psıhıkalyq aýytqýy bar degen jeleýmen jazadan qutylyp ketpese deıdi.
Rasynda kúdiktiniń psıhıkalyq aýytqýy bar-joǵy tergeý barysynda anyqtalar. Eldi eleń etkizgen oqıǵaǵa baılanysty beıtarap pikir bildirgen psıholog mamannyń sózinshe aqyl-esi durys adamnyń mundaı aıýandyqqa barýy múmkin emes.
– Shynymen óte aýyr oqıǵa. Birjaqty pikir aıtý tym qıyn. Mundaı qylmysqa barǵan adamda manıaktyq aýytqý bolýy ábden múmkin. Bul aýytqýdy aıǵaqtyq jáne jasyryn dep eki topqa bólsek kúdiktiniń áreketin jasyrynǵa jatqyzamyz. Kannıbalızmniń sıpattary da baıqalady. Bala kúninde alǵan psıhıkalyq jaraqaty, áıel zatyna degen ókpe-renishi, psıHıkalyq soqqy bári osyǵan sebep bolýy yqtımal. Mundaı aýytqýǵa ushyraǵan adamdar, ásirese kóktem, kúz aılarynda qozady. Ata-ana meıirimine qanbaǵan, sátsiz mahabbatqa ushyraǵan, jany jaralanǵan jandar tasjúrekke aınalýy múmkin. Bul bizdiń psıholog retindegi joramalymyz ǵana. Dene múshelerin kesip alý júıke kóteretin júk emes. Taǵy bir aıta keter jaıt, qannyń adam psıhıkasyna qatty áser etetin qasıeti bar. Tergeý nátıjesi aıaqtalǵannan keıin tolyq mán-jaı belgili bolar, – deıdi Almaty oblystyq Kámeletke tolmaǵandar isteri jónindegi sotynyń ınspektor-psıhology Marjan Eliqulova.
Qoǵamǵa úreı týǵyzǵan jan túrshiktirer jaǵdaı týraly aıtýǵa aýzyń barmaıdy. Eń ókinishtisi, mundaı jaıt alǵash ret oryn alyp otyrǵan joq. Joǵary bilimi bar azamattyń adam aıtsa nanǵysyz qatygezdikke qalaı barǵany qaıran qaldyrady. Istiń aq-qarasy anyqtalyp, qylmysker tıisti jazasyn ala jatar...
ALMATY
