Ýchaskelik polısııa ınspektory 28 naýryz kúni saǵat 21:30 shamasynda aýyldaǵy avtojolmen ótip bara jatqan kezde joldyń shetine toqtaǵan 64 jastaǵy aýyl turǵynynyń «VAZ» markaly avtokóligin baıqaǵan. Polıseı toqtap, qandaı kómek qajet ekendigin suraǵan. Er adam kóliktiń synyp qalǵany, ulynyń qajetti bólshekti ákele jatqany jaıly aıtqan. Alaıda ýchaskelik ınspektor shette turǵan jas jigitti baıqaǵan. Ol 29 jastaǵy jigittiń kólikke sibir eliginiń óli denesin súırep bara jatqanyn kórgen. Ýchaskelik ınspektor oqıǵa ornyna dereý jedel-tergeý tobyn shaqyrǵan. Kólikten 12 kalıbrli tegis uńǵyly qarý alyndy. Atalǵan fakt QR Qylmystyq kodeksiniń 337-baby (Zańsyz ańshylyq) boıynsha Sotqa deıingi tergep-tekserýlerdiń biryńǵaı tizilimine engizildi.
– Kúdiktilerdiń úlkeniniń aıtýynsha, ol qarýdyń serippesin aýystyryp, tekserip kórmek bolǵan. Ulymen ormanǵa barǵanda onyń kózine elik ilikken. Tergeý áreketteri júrgizilýde, qajetti saraptamalar taǵaıyndaldy. Bul jyl basynan beri aýdanda anyqtalǵan zańsyz ań aýlaýdyń alǵashqy deregi. О́ńir turǵyndaryna ań aýlaý maýsymynyń ótken jyldyń jeltoqsan aıynda jabylǵany jaıly eskertemiz. Ańshylardan zańnamany qatań saqtaýdy suraımyz, – dedi Qyzyljar aýdanynyń PB bastyǵynyń mindetin atqarýshy Pıotr Klımov.
