Zań jobasynyń basty maqsaty - múshe memleketterdiń básekelestiktegi erekshelikterine baǵyttalǵan ózara tıimdi saýda-ekonomıkalyq tetikterdi qalyptastyrý jáne osy saladaǵy tıimdi sharalar ázirleý bolyp tabylady. Kelisim sondaı-aq EAEO kedendik aýmaǵynda baǵaly metaldar men tastardyń erkin aınalymyn qamtamasyz etý úshin jaǵdaı jasaýdy kózdeıdi.
Qujatta sonymen qatar baǵaly metaldarmen jáne óńdelmegen asyl tastarmen operasııalardy júzege asyrý, mámileler jasaý jáne klassıfıkasııasy men qundylyq sıpattamalaryn anyqtaý, zergerlik buıymdardy jáne EAEO aýmaǵynda ımporttalǵan nemese óndirilgen basqa ónimderdi synaý, taldaý jáne markalaý tetikteri de bar.
Senator Jeńis Nurǵalıevtiń pikirinshe, Kelisim odaq elderindegi zergerlik buıymdardyń ishki naryǵynda zergerlik buıymdarmen ózara saýdada taldaý belgilerin moıyndalmaýyna baılanysty shekteýlerdi joıýǵa oń áser etedi.
«Eger zergerlik buıym Qazaqstan aýmaǵynda jasalyp, synaqtan ótse, onda bul buıym EAEO elderinde satylǵan kezde qaıta testileý qajet bolmaıdy», dedi Jeńis Nurǵalıev.
Kelisim taldaý belgileriniń úlgilerimen jáne olardyń sıpattamalarymen almasý, sondaı-aq Aqshany jylystatýǵa qarsy kúres jónindegi qarjylyq sharalardy ázirleý tobynyń usynymdaryn eskere otyryp, qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy aqparat almasýdy kózdeıdi. Bul normalar tolyq esepjúrgizýge jáne sybaılas jemqorlyqpen kúresýge múmkindik beredi.
Qarjy jáne bıýdjet komıteti zań jobasyn palataǵa usyndy.
