Shalǵaı aýyldardaǵy kópten qordalanyp qalǵan mańyzdy máseleniń biri – múmkindigi shekteýli adamdarǵa, onyń ishinde jastarǵa kásibı baǵdar berý. Keı-keıde on eki múshesi saý adamdar da eki qolǵa bir kúrek taba almaıtyny bar. El ishindegi múmkindigi shekteýli jastar arasynda belgili bir mamandyq alsaq, táp-táýir tabysy bar jumys istesek dep alǵa umtylatyndar az emes. Onyń ústine kásibı jaǵynan daıarlaıtyn oqý oryndary da joq. Bul jobanyń basty maqsaty – olardyń áleýmettik-turmystyq jaǵdaıyn jaqsartý. Ol úshin jastarǵa qolynan keler kásiptiń qyr-syryn meńgertip, taǵdyrdyń salǵan isine moıymaı, ózin-ózi shyńdaı damytýǵa jol ashý. Elmen aralasyp, tyrbanyp tirshilik istese, kirpish dúnıeniń ketigine jaraǵandaryn da qýanysh kórip, kóńilderin demdeıdi ári ómirge beıimdeledi.
Joba aıasynda «Batyr» qoǵamdyq birlestiginiń «Tulǵany damytý ortalyǵy» bazasy turaqty túrde múmkindigi shekteýli adamdardy belgili bir kásipke daıarlap, keıin jumysqa ornalastyrmaq. Ortalyq qajetti tigin mashınasy, kompıýter tárizdi quraldarmen jabdyqtalǵan. Qoly epsekti adamdardyń aıy ońynan týmaq. Aıtalyq, tigin isi, shashtaraz, dástúrli halyqtyq qolóner, aǵash, teri óńdeý, kompıýterlik saýattylyq baǵytynda bastapqy bilimin jınaqtap, tájirıbelerin tolyqtyra alady. Arǵy jaǵy ózderine baılanysty.
Jalpaq álemdi jaman indet ıektep, alqymyńnan alyp turǵan ýaqytta múmkindigi shekteýli adamdardyń da qatardan qalmaı qareket etýine qamqorlyq jasalýy adamı turǵydan alǵanda ımandy sharýa ekendigi sózsiz. Aqmol aýylynda bastalǵan aqjarylqap bastamanyń baǵaly bolatyndyǵy da sondyqtan.
Aqmola oblysy,
Selınograd aýdany
