Ilbis fototuzaqqa ilindi

Tehnıkanyń múmkindigi ǵoı, áıtpese Altaıdy qar barysy meken etedi degenge biri sense, biri senbes te edi. Olaı deıtinim, kóz kórim jerden qar barysyn kórdik dep otyratyn baıaǵynyń ańshylaryna kóp eshkim ılana bermeıtin. Al taǵylardy ap-anyq túsirgen foto men beıne jazbalarǵa qarap, tańdaı qaqpasqa amal joq.   

Katonqaraǵaı memlekettik ulttyq parkiniń qyzmetkerleri Jomart Amanbaev, Manarbek Omarov jáne Murat Arabaevtar byltyr qara kúzde Arshaty ormanshylyǵynyń aýmaǵyna ornatqan fototuzaqtaryn tek­serip otyryp, barystyń tas­palanǵanyn kórgen. Bar-joǵy otyz sekýndtyq beınejazba bol­ǵanymen, park qyzmetkerleri úshin óte úlken eńbekpen kelgen ol­ja. Bul úshin olarǵa qomaqty syıaqy taǵaıyndasa da artyq etpes edi. Zamanaýı tehnıkanyń tilin meńgerý bir basqa, ony 2300 metr bıiktiktegi barys jú­redi-aý degen tusqa ornatý biz oılaǵandaı ońaı sharýa emes.

Teńiz deńgeıinen 2300 metr bıiktikti basqa shyńdarmen sa­lystyrsaq, anaǵurlym alasa. Biraq Tór Altaıdyń ár tóbesi minezdi. It tumsyǵy ótpes qa­lyń qara ormanyn jaryp ótip, shaǵyl tasty beldeýge jetkende júris óndimeıdi. Odan asyp jy­ǵylsań, jalama betkeıler, shapshyma shyńdary jáne bar. Atpen jetseń, bir sári. Jaıaý-jalpy kóterilesiń. Fototuzaqty ornattyń delik. Kelesi barǵanda, bir-birinen aınymaıtyn quz-jartastardyń arasynan judy­ryqtaı qurylǵyny adaspaı ta­býyń kerek. Áýresi kóp. Inspektorlardyń osyndaı shabystaryna qaraı tabystary saı ma?

– Qazaqstannyń Qyzyl kita­byna engen qar barysynyń beınetaspaǵa ilinýi, biz úshin úlken qýanysh. Eńbektiń jemisi deý­ge bolady. Qurylǵyny taý basyna quryp, qadaǵalap júr­gen ınspektorlarǵa rah­met. Kóp­shiliktiń nazaryna usynyl­ǵan barystyń beınejazbasy, fotosýreti 2020 jyldyń jel­toqsanynda, osy jyldyń aq­pan, naýryz aılarynda túsken. Qa­zirgi ýaqytta materıaldardy anyqtap jatyrmyz, – dedi ulttyq tabıǵı parktiń janýarlardy qorǵaý jáne óndirý bóliminiń meńgerýshisi Erik Qasymov.

Aıta keterligi, fototuzaqtar tolyqtaı tekserilgen joq. En­digileri taýdyń qııa-betkeıle­rin­de tur. Ony mamandar jos­parǵa saı sáýir, mamyr aılarynda qa­raı­dy. Sol kezde kópshilikti tań­ǵal­dyratyn kadrlar taǵy shyǵýy múmkin.

Shyǵys Qazaqstan oblysy,

Katonqaraǵaı aýdany