Jýsan Bank ókiliniń aıtýynsha, klıentter bazasyn biriktirip, zamanaýı ozyq tehnologııalardy engizý arqyly qarjy ınstıtýty naryqtaǵy úlesin arttyrmaq. Birigý prosesinen soń qos banktiń naryqtaǵy úlesi qazirgi 10 paıyzdan da qarqyndy ósedi dep boljanǵan. «Biz qarjylyq pozısııalary berik jáne sıfrly servısteri asa yńǵaıly senimdi ári zamanaýı bank quryp jatyrmyz» deıdi Jýsan Bank dırektorlar keńesiniń tóraǵasy Shıgeo Katsý.
Birigý sharasynan keıin Jusan Bank búkil elimiz boıynsha 1,1 myń birlikten asatyn eń iri bankomattar jelisin jáne 180-nen astam bólimshelerdi qamtıtyn bolady.
– Biz jeke tulǵalar, sondaı-aq shaǵyn jáne orta bıznes úshin bank ónimderin damytyp jatyrmyz. Barlyq klıentterge kredıt berý, taýarlardy bólip tóleýmen satyp alý, sondaı-aq qarajat jınaý jáne óz jınaq qarajatyn ınvestısııalaý boıynsha biregeı ónimder usynylady. Bizdiń servısimizdiń ereksheligi – barlyq ónimdi mobıldi jáne ınternet arnalary arqyly onlaın alý. Biz ATFBanktiń barlyq klıentine «qosh keldińizder» degimiz keledi jáne olar Jýsan sıfrly ekojúıesiniń artyqshylyqtaryna óziniń joǵary baǵasyn beredi degen senimdemiz, – deıdi Jýsan Bank basqarma tóraǵasy Aıbek Qaıyp.
ATFBank basqarma tóraǵasy Galııa Mahanova aldaǵy birigý prosessteriniń árbir klıent úshin barynsha jaıly ótýi úshin bar kúshin salatynyn jetkizdi.
– Eki banktiń birigýi barysynda ATFBanktiń barlyq bólimi men servısi Jýsan Bank-ke qyzmet kórsetýge tolyq kóshkenge deıin qalypty rejimde jumysyn jalǵastyratyn bolady, – dep atap ótti ATFBank basqarma tóraǵasy.
Osylaısha, eldegi ekinshi deńgeıli bankter sany 24-ke azaıdy. Al birikennen soń aktıv kólemi 3 trln teńgeden asyp, Jýsan-nyń otandyq bank sektoryndaǵy úlesi 10 paıyzdan asyp túspek. Eske salsaq, Jýsan 2020 jyldyń sońynda Qarjy naryǵyn retteý jáne damytý agenttiginiń ruqsatynan soń ATFBank aksııasynyń 99,76 paıyzyn ıelengen edi. ATF-tyń 124 mlrd teńge kólemindegi jeke kapıtaly qosymsha provızııalar qurýǵa jumsalǵan. Kelisim nátıjesinde ATFBanktiń burynǵy aksıoneri Ǵalymjan Esenov 19,97 paıyz aksııa ıelený arqyly Jýsan Bank-tiń iri aksıoneri atandy.
