Medısınalyq saqtandyrý qory atalǵan shaǵym negizinde jan-jaqty saraptama júrgizdi. Aqparattyq júıelerdegi derekke súıensek, 24 qańtarda shetelden kelgen Evgenıı Muhamedjanov pen onyń jubaıy «Astana Inter Otel» qonaqúıine ornalastyrylyp, COVID-19 ınfeksııasyna test tapsyrǵan. Bas sanıtarlyq dárigerdiń 2020 jyly 23 qazandaǵy qaýlysy boıynsha shetelden kelgen azamattar COVID-19 ınfeksııasyna PTR-analız tapsyrmasa, 2 táýlikke deıin karantındik stasıonarǵa jatqyzylýy tıis. Muhamedjanovtar da osy tártip boıynsha karantınge jatqyzylǵan, bul qyzmet aqparattyq júıege «Aýrýǵa kúdik týyndaýyna baılanysty baqylaý júrgizý» degen ataýmen engizilgen.
«Astana Inter Otel» qonaqúıi COVID-19 juqtyrǵan jáne koronavırýstyń aldyn alýǵa qatysatyn densaýlyq saqtaý nysandary men medısınalyq emes uıymdar tizimine engen. Buǵan Almaty qoǵamdyq densaýlyq basqarmasy men Sanıtarlyq-epıdemıologııalyq baqylaý komıtetiniń Almaty departamenti arasyndaǵy kelisim negiz bolyp otyr.
Medısınalyq saqtandyrý qorynyń málimetinshe, COVID-19 ınfeksııasyn emdeý, aldyn alý sharalarynyń aqysy juqpaly aýrýlar profıli boıynsha lısenzııasy bar emdeý mekemeleri arqyly tólenedi. Sondyqtan atalǵan azamatqa kórsetilgen qyzmet «Izatıma Jekenova atyndaǵy qalalyq klınıkalyq juqpaly aýrýlar aýrýhanasy» arqyly tólengen.
Saraptama barysynda shaǵymdanýshynyń karantındik stasıonarǵa jatqyzylǵany rastaldy. Oǵan qosa, shetelden oralǵan azamattardy ornalastyrýmen aınalysqan medısına uıymy tıisti derekterdi aqparattyq júıege kesh engizgen. Bul másele Qoǵamdyq densaýlyq basqarmasyna habarlandy, aldaǵy ýaqytta jaýapty mamandarǵa shara qoldanylýy tıis.
Eske sala ketsek, klınıkalar medısınalyq qyzmet kórsetildi dep jalǵan aqpar tirkegen jaǵdaıda Qordyń 1406 biryńǵaı baılanys ortalyǵy men Qoldau 24/7 mobıldi qosymshasy arqyly shaǵymdanýǵa bolady.
2020 jyly Áleýmettik medısınalyq saqtandyrý qorynyń mamandary medısınalyq qyzmetterdiń sapasy men kólemi boıynsha 1,2 mln-nan asa kemshilikti anyqtaǵany týraly habarlady. Monıtorıng kórsetkendeı, eń kóp taralǵan buzýshylyq (60%) – bul kómek kóleminiń jasandy ósýi. Kelesi kezekte – esep qujattaryn qate toltyrý, bul barlyq jaıttyń 15%-y, al emdeý jáne dıagnostıka sharalaryn oryndaý barysynda standarttar men klınıkalyq protokoldardan negizsiz aýytqý – 9,6%. Sondaı-aq naýqastardyń dıagnozyn jasandy qıyndatý, aýrýhanaǵa jatqyzbaý nemese medısınalyq kómek kórsetpeý, qyzmetter men dári-dármekterdi «berildi» dep jalǵan toltyrý jaıttary kezdesedi.
2020 jyldyń qorytyndysy boıynsha ÁMSQ 21 myńnan astam qyzmettiń shyn máninde oryndalmaǵanyn anyqtady, onyń jalpy quny 290,9 mln teńgege (ekonomıkalyq sharalardy eskergende) jetedi. Onyń ishinde ambýlatorlyq-polıklınıkalyq kómek, keńes berý jáne dıagnostıka qyzmetteri deńgeıinde – 167 mln teńge somaǵa 20 122 kemshilik anyqtaldy. Bıyl Qor sapany baqylaý júıesine ózgerister engizýdi josparlap otyr. Medısınalyq qyzmetterdi kórsetý tártibi men pasıentterdiń quqyǵyn buzýǵa ákep soǵatyn jaǵdaılar men sebepterdi anyqtaý jáne aldyn alýǵa baǵyttalǵan proaktıvti monıtorıng engiziledi.
