«Ata mektebi» – jastardyń ata-anasyn aýylda qaldyryp, oqýǵa, jumys isteýge, tabys tabý úshin qalaǵa ketýge májbúr bolatyny týraly qoıylym. Alaıda ý-shýy mol qalanyń áseri me, álde albyrttyq pa, aýyldan ókshe kótergen jastyń deni jaryq dúnıege ákelgen ata-anasyna habarlasýdy umytatynyn qaıtersiń? Tipti kindik kesken aýylyna barmaıtyndar kóp. Bul – kúndelikti ómirde qalypqa aınalǵan úrdis. Osynyń bári sahnada ata men nemereniń beınesinde kórinis tapty. Qala balasy aýylda ótkizgen qysqa merzimde atasynyń danalyq ulaǵatyna qýana zeıin qoıady. Paıdaly aqyl-keńes alyp, dombyrada oınaýdy úırendi. Baqshadaǵy jumysqa kómektesti. Qaladaǵy ata-anasyna oralar sátte atasyn qushaqtaǵan nemere taǵy da kelýge ýáde berdi.
– Aǵa býyn – otbasylyq qundylyqtar men dástúrdi saqtap, keıingi urpaqqa jetkizetin altyn kópir. Bala tárbıesinde mańyzdy ról atqarady. Ata-ájeni eshbir mektep te, balabaqsha da almastyra almaıdy. Sol sebepten, biz aýyldaǵy qart ata-ananyń balalaryna, nemerelerine degen saǵynyshyn, ónegelik ulaǵatyn kórsetýdi kózdedik. Qarııalar qarashańyraqty tastap, balalary turatyn qalaǵa qonys aýdarǵysy kelmeıdi. Keıde ózim de alys aýyldaǵy ata-anamdy oılap, muńaıyp qalamyn. Bul – ómir. Desek te, eń basty oıdy – ata-anany jalǵyz qaldyrmaýdy kórermenge jetkize aldyq, – deıdi dramatýrgııa avtory
B.Zınýllın.
Akademııalyq drama teatrdyń dırektory Berik Jámenovtiń aıtýynsha, Atyraýda qýyrshaq teatryn ashý ıdeıasy osydan birneshe jyl buryn týyndaǵan eken. Alaıda ony iske asyrýǵa balalarǵa arnalǵan dramatýrgııanyń kenjelep qalǵany qolbaılaý bolǵan.
– Ońtústik óńirdegi qýyrshaq teatrynyń ártisteriniń qazaq dalasynan ózge elge quldyqqa satylǵan Beıbarys sultannyń balalyq shaǵy týraly jazylǵan Rahymjan Otarbaevtyń «Saǵynysh shóbi» atty pesany sahnalaǵanyna kýá bolǵan edim. Sol spektakldegi kórinister júrek qylyn qozǵap jiberdi. Mundaı teatrdy Atyraýda ashýǵa bolmaı ma? Bul týraly teatrymyzdyń ártisterine usynys aıtyp edim. Olar qýyrshaq teatryn ashý bastamasyn birden qoldady, – deıdi Berik Jámenov.
Onyń aıtýynsha, bolashaqta Almaty men Aqtóbe qalalaryndaǵy qýyrshaq teatrlarynyń mamandaryn, ártisterin shaqyrý josparlanyp otyr. Jas kórermenderge arnalǵan qoıylymdarǵa balalar da qatystyrylady.
Atyraý oblysy
