“BALDÁÝRENDE” О́TKEN DО́ŃGELEK ÚSTEL

Parlament Májilisiniń Áleýmettik-mádenı damý  komıteti  Bilim jáne ǵylym mınıstr­ligimen birlesip, “Baldáýren” respýblıkalyq oqý-saýyqtyrý ortalyǵynda “Qazaqstan Respýblıkasyndaǵy balalar men jasóspirimderdiń jazǵy demalysyn, saýyqtyrý jáne jumyspen qamtylýyn uıymdastyrý” taqy­rybynda dóńgelek ústel ótkizdi. Dóńgelek ústelge qatysýshylar “Baldáýren” ortalyǵynyń jumysymen tanysyp, lagerde demalyp jatqan balalarmen kezdesip áńgime­lesti, sabaqtaryna qatysty. Odan keıin dóńge­lek ústeldiń kún tártibine sáıkes Bilim jáne ǵylym mınıstrliginiń balalardyń quqyqtaryn qorǵaý komıtetiniń tóraıymy Raısa Sherdiń “Qazaqstan Respýblıkasyndaǵy balalar men jasóspirimderdiń jazǵy demalysyn, saýyqtyrý jáne jumyspen qamtylýyn uıymdastyrý jaǵdaıy týraly” degen taqyryptaǵy baıanda­masy tyńdaldy. Onda jyl saıyn elimizde ár túrli úlgidegi 10 myńnan astam lagerdiń jumys istep, 1 mıllıonnan astam balany qamtıtyny aıtyldy. Sodan keıin basqosýǵa qatysýshylarǵa “Artek” (Ýkraına), “Orlenok”, “Okean” (Reseı), “Zýbrenok” (Belarýs) halyqaralyq balalar ortalyqtarynyń jumysy týraly fılm  kórsetilip, “Baldáýren” respýblıkalyq oqý-saýyqtyrý ortalyǵynyń damý bolashaǵy týraly onyń bas dırektory Muhıtdın Tólep­baev sóz sóıledi. Onyń málimdeýinshe, “Baldáýren” ROSO jyl boıy jumys isteıdi jáne aýysymyna úzdik oqýy, belsendi ómirlik ustanymy úshin konkýrstyq negizde joldama alǵan 11-den 15 jasqa deıingi 300 balaǵa deıin qabyldaıdy. Oqýshylardyń jazǵy demalysyn damy­týdyń óńirlik máselelerin sheshý boıynsha óz aýmaqtarynda jyl boıy jumys isteıtin balalar ortalyqtary bar Ońtústik Qazaqstan jáne Mańǵystaý oblystary bilim basqar­malarynyń bastyqtary óz usynystarymen bólisti. Elimizde mundaı ortalyqtar – jeteý. Balalar men jasóspirimderdiń jazǵy demalysyn, saýyqtyrý men jumyspen qamtylýyn qarjylandyrý jaǵdaıy týraly  Qarjy mınıstrligi departament dırektory­nyń orynbasary Varvara Úsipbekova aıtyp berdi. Basqosýǵa qatysýshylar atalǵan jumysty jetildirý máseleleri boıynsha suraq-jaýaptarmen pikir almasty, saýyqtyrý lagerleri júıesin budan ári damytý týraly usynystardy talqylady. Qatysýshylar qabyldanyp otyrǵan sharalarǵa qaramastan, balalar men jasóspirimderdiń demalysyn uıymdastyrý  jáne  saýyqtyrýmen qamtý sharalary jetkiliksiz degen pikirge keldi. Saýyqtyrý lagerlerine az qamtamasyz etilgen, kóp balaly otbasylary balalarynyń qoljetimdiligi problemalyq másele bolyp otyr – respýblıka boıynsha jazǵy balalar lagerlerine joldamanyń ortasha baǵasy 7 myń teńgeden 45 myń teńgege deıingi aralyqty quraıdy. Dóńgelek ústel jumysynyń qorytyndysy boıynsha balalar men jasóspirimderdiń jazǵy demalysyn uıymdastyrýdy jetildirý, jazǵy kezeńde oqýshylardy saýyqtyrý, jumyspen qamtýdy qamtamasyz etýdiń jańa turǵylaryn daıyndaý, balalar men jasóspirimderdiń demalysyn, saýyqtyrý jáne jumyspen qamtylýyn daıyndaý jáne uıymdastyrý boıynsha barlyq deńgeıde komıssııalar qurý, sondaı-aq balalar lagerlerin paıdalanýǵa qabyldaý daıyndyǵy, barlyq qala syrtyndaǵy lagerler men demalys aımaqtaryn esepke alý, olardy Qazaqstan Respýblıkasynyń zańdaryna sáıkes lısenzııalarmen qamtý, ata-analarynyń qamqorlyǵynsyz qalǵan balalardy, memlekettik qoldaýǵa muqtaj kóp balaly, tolyq emes, az qamtylǵan otbasynyń balalaryn, ómirdiń qıyn jaǵdaıynda qalǵan “táýekel” toptyń balalaryn, ekologııalyq jaısyz aýdandarda turatyn balalardy, múgedek balalardy jáne damýdaǵy múmkindikteri shekteýli balalardy jazǵy kezeńde jergilikti bıýdjet qarajaty esebinen tegin joldamamen qamtamasyz etý, eńbek zańdaryna sáıkes jazǵy kanıkýl kezinde ýaqytsha jumys oryndaryn qurý jolymen jasóspirimderdi jumyspen qamtý týraly usynystar qabyldandy. Dóńgelek ústel jumysyna Parlament depýtattary, birqatar ortalyq jáne jergilikti atqarýshy organdardyń ókilderi qatysty. Sáýle DOSJANOVA, jýrnalıst.