Birer kún buryn Qazaqstanyń grek-rım kúresi quramasynyń bas bapkeri Almatydaǵy lısenzııalyq týrnırge qatysatyn balýandardyń tizimin jarııalady. Bizdi qatty tańǵaldyrǵany, «klassıkterdi» baptaıtyn Baqtııar Baıseıitovtiń tańdaýy 130 kılo salmaqtaǵy 33 jastaǵy Nurmahan Tinálıevke emes, úlken sportpen qoshtasyp, birneshe jyldan beri bapkerlik ónerge bet burǵan 40 jastaǵy apaıtós balýan Georgıı Sýrsýmııaǵa túskeni.
2004 jyly Afına Olımpıadasynyń kúmis, 2003 jylǵy álem chempıonatynyń qola júldegeri atanǵan Sýrsýmııa osylaısha araǵa on jylǵa jýyq ýaqyt salyp úlken sportqa qaıta oraldy. Bas bapker B.Baıseıitov Almatydaǵy lısenzııalyq týrnırde beldesetin aýyr salmaqtaǵy sportshylar arasynan ne úshin Georgııdi tańdaǵanyn bylaı túsindirdi: «Georgıı Sýrsýmııaǵa toqtalatyn bolsam, ol bul básekege bir jyl boıy tynymsyz daıyndaldy. Oqý-jattyǵý jıyny kezinde bapkerlerge de kómektesip, ózi de jattyǵýdan qol úzgen joq. Qazir ol naǵyz babynda dep aıta alamyn. Aldaǵy jarysqa qatysýǵa saqadaı saı bolǵan soń, osy balýandy tańdadyq. Qazirgi babymen ol quramada júrgen biraz balýanǵa básekelestik tanyta alady. Sáýir aıy tartysty jekpe-jekterge toly bolmaq. Biz óz kezegimizde jankúıerlerge naǵyz mereke syılaýǵa tyrysamyz», dedi ol.
Al osydan biraz ýaqyt buryn bergen bir suhbatynda ol eger Nurmahan Tinálıev Almatydaǵy jarys aldynda babynda bolsa, asa aýyr salmaqta kúresýi múmkin degen edi. Soǵan qaraǵanda, 2012 jáne 2016 jylǵy Olımpııa oıyndarynda baq synaǵan Tinálıev babyna enip úlgermegen sııaqty.
Georgıı Sýrsýmııa Almatydaǵy irikteý týrnırinde jasyndaı jarqyldap, Tokıo Olımpıadasyna joldama jeńip alatyn bolsa, araǵa 16 jyl salyp lısenzııa alǵan Qazaqstandaǵy sanaýly sportshynyń qataryna kiredi. Grek-rım kúresinen Olımpıadaǵa joldama beretin qurlyqtyq irikteý jarysyna Qazaqstan quramasynan Meıirjan Shermahanbet (67 kılo), Nursultan Tursynov (87 kılo) jáne Oljas Syrlybaı (97 kılo) qatysady.
Ulttyq quramanyń uzaq jyldar boıy úzdigi atanyp, eki Olımpıadaǵa qatysqan Almat Kebispaev lısenzııalyq týrnırden syrt qaldy. Ol Italııada ótken reıtıngtik týrnırdiń fınalynda Meıirjan Shermahanbetten 0:9 esebimen jeńilgen-di. Osydan soń bapkerler Meıirjanǵa múmkindik berýdi jón sanaǵan. Al Nursultan Tursynov pen Oljas Syrlybaı bıyl el chempıonatynda kózge túsip, Italııadaǵy týrnırde júldegerler qatarynan kóringen bolatyn.
