Jastar resýrstyq ortalyǵynyń janynan qurylǵan IT park mamandary byltyr buzylǵan kompıýterlerdi kádege jaratyp, oqýshylarǵa tabystaǵan edi. Jyl basynan beri ortalyq eriktileri «QazGerMunaı» kompanııasy usynǵan jaramdy kompıýterlerdi áleýmettik turmysy tómen 10 otbasyna taratyp berdi.
Jaqsylyqqa jumylǵan jastar 8 naýryz Halyqaralyq áıelder kúni merekesi qarsańynda da jurt alǵysyn alarlyq jaqsy istiń basynan tabyldy. Arnaıy uıymdastyrylǵan marafon aıasynda oblys ortalyǵyndaǵy 700 otbasyna, qalaǵa qarasty kent jáne aýyldyq okrýgterde turatyn 300 úıge azyq-túlik jetkizip berdi.
– Jalpy uıymdastyrylyp jatqan qaıyrymdylyq sharalarynyń bárinde kóptiń úlesi bar. Jeke adamdardan bólek túrli qorlar men mekemeler de qınalǵanǵa qol ushyn sozyp, úlgili úrdis tanytyp otyrǵanyn aıta keteıik. Mysaly, «Halyq» qaıyrymdylyq qory múmkindigi shekteýli balalar tárbıelep otyrǵan myń otbasyna azyq-túlikpen kómek kórsetti, – deıdi B.Aıtbenbetov
Tórt júzden astam shańyraqqa kómek qolyn sozǵan «Zeket» qoryna da rızashylyq tanytqandar kóp.
«Qaıyrymdy ister marafony» aıasynda jyl basynan beri Jastar ortalyǵynyń ǵımaratyndaǵy áleýmettik dúken arqyly turmysy tómen 33 otbasyna azyq-túlik, turmysqa qajetti zattar, úı jıhazdary taratylypty. Jaqsy isterdi uıymdastyratyn jastar nazarynan oqys oqıǵa saldarynan qıyndyqqa tap bolǵandar jaǵdaıy da tys qalmaıdy. Bıyl jyl basynan beri qala mańaıyndaǵy saıajaılarda órt bolyp, aıaq astynan baspanasyz qalǵandarǵa jurt kómekke jumylǵan edi.
Oblystyq jastar ortalyǵynyń bastamasymen eriktiler men «El-Araı» qoǵamdyq qory birlese otyryp, órtten zardap shekken Iаgodka, Sabalaq saıajaıynyń turǵyndaryna turmysqa qajetti taýarlar, kıim-keshek, kompıýter jıyntyǵy, men ydys-aıaqtar tabys etti.
Qyzylorda oblysy
