Qazirgi ýaqytta quramyna Ázerbaıjan, Qazaqstan, Qyrǵyzstan, О́zbekstan jáne Túrkııa kiretin Keńesti qurý ıdeıasyn alǵash ret Tuńǵysh Prezıdentimiz Nursultan Nazarbaev usynǵan-dy. Sol kezde Elbasy bul qurylym keleshekte geografııalyq jáne energetıkalyq turǵydan Shyǵys pen Batys arasyndaǵy baılanystyrýshy býynǵa aınalady dep boljaǵanyn atap ótken jón.
Túrki keńesiniń I sammıti dál Qazaqstanda ótýi túrkitildes elderdi biriktirý boıynsha ıntegrasııalyq úderistiń kezekti joly boldy. Qazaqstandyq syrtqy saıasatqa qatysty kópvektorly strategııa aıasyndaǵy mańyzdy baǵyttardyń biri retinde túrki vektorynyń bolýy zańdy.
Osyndaı aýmaqtyq tetiktiń bolýy ártúrli baǵyttar boıynsha memleketaralyq dıalogtyń kún tártibin aıtarlyqtaı keńeıtýge múmkindik berdi. Sondyqtan da ótken kezdesý aıasynda Túrki Keńesiniń 2020-2025 jyldarǵa arnalǵan strategııasy men Túrki áleminiń 2040 jylǵa deıingi kezeńge arnalǵan jospary qaraldy.
Nursultan Nazarbaev Túrki keńesiniń Qurmetti Tóraǵasy retinde túrki áleminiń keń keńistiginde mádenı birlik pen ekonomıkalyq kooperasııa ıdeıasyn saqtaýdyń mańyzdylyǵyn atap ótti. Osy turǵyda Elbasynyń Keńesti transformasııalaý jónindegi usynysy erekshe mánge ıe.
Túrki keńesine múshe memleketter basshylarynyń kezdesýinde sóılegen sózinde Qazaqstan Prezıdenti Qasym-Jomart Toqaev túrki memleketteri jańa syn-qaterlermen betpe-bet kelýge májbúr ekenin, olarǵa qarsy is-qımyl kópjaqty yntymaqtastyqtyń tabystylyǵyna baılanysty bolatynyn atap ótti.
Qazaqstan Prezıdenti sondaı-aq Túrki órkenıetin jańǵyrtýdy bastaýǵa shaqyrdy. Sammıttiń «Túrkistan – Túrki áleminiń rýhanı astanasy» taqyrybymen ótýi Túrki keńesi músheleriniń álemge uly túrki oıshyldarynyń biregeı kıeli eskertkishteri men muralaryn birlesip kórsetý nıetin bildiredi.
Túrki keńesi túrkitildes memleketter arasyndaǵy seriktestiktiń ortalyq elementi bolyp qala beredi dep qorytyndy jasaýǵa bolady. TMYK áleýetin paıdalaný qatysýshy elderge ózgerip jatqan geosaıası jaǵdaılarǵa der kezinde beıimdelýge, bul rette ekonomıkalyq qaýipsizdikti qamtamasyz etý deńgeıin arttyrýǵa múmkindik beredi.
Lıdııa PARHOMChIK,
Nursultan Nazarbaev qory janyndaǵy Álemdik ekonomıka jáne saıasat ınstıtýtynyń sarapshysy
