О́tken jyly polısııa qyzmetkerleri otbasynyń oırany shyǵyp, barar jer, basar taýy qalmaǵan 11 myńnan astam áıeldi daǵdarys ortalyqtaryna ornalastyrýǵa májbúr bolǵan. Búginde elimiz boıynsha mundaı ortalyqtardyń sany 40-qa jýyqtap qalǵan. Turmystyq zorlyq-zombylyqtan zardap shekkenderge áleýmettik ońaltý ortalyqtarynyń 30-ynda arnaıy baspana da jasaqtalǵan.
Brıfıngte A.Mılıýk sońǵy 5 jylda áıelder quqyǵyna qol suǵatyn qylmystardyń eki esege, al balalarǵa qatysty qylmystardyń sany úshten birge qysqarǵanymen karantın jáne qatań oqshaýlaý kezinde turmystyq zorlyq-zombylyqtyń tym shıelenisip ketkenin jetkizdi.
Zorlyqshylarmen kúres júrgizýde saldarynan góri sebebin anyqtap, aldyn alýdyń jón ekenin alǵa tartqan IIM ókili otbasylyq janjaldardy boldyrmaýdyń birneshe tetikterine toqtaldy. «Eń aldymen otbasy tırandarymen jeke-jeke jumys júrgizgen durys. Qazirgi tańda elimizde qorǵanys erejesi kóptep qoldanylyp júr. Bul ereje otbasynda zorlyq-zombylyq jasaýǵa beıim adamnyń qurbandarmen 1 aıǵa deıin baılanysýyna tyıym salady. Shekteýlerdi buzǵan quqyq buzýshy 5 táýlikke deıin qamaqqa alynady», dedi spıker.
Sondaı-aq sot tártibimen otbasy tırandaryna tyıym salýlar men shekteýlerdiń keńeıtilgen tizbesi kórsetilgen minez-qulyqqa erekshe talaptar belgilenýi de múmkin. Mundaı sheshimder ádette 3 aıdan bastap 1 jylǵa deıin qoldanylady. Máselen, shańyraǵynyń shyrqyn buzyp júrgen erkekke qarý saqtaýǵa, tipti úıde ishimdik ishýge tyıym salynýy múmkin. Al jaǵdaı tym kúrdeli bolyp, bir baspana astynda turý múmkin bolmaǵan jaǵdaıda sot zorlyqshyl otaǵasynyń basqa úıi bolsa, páterden 10 kúnge shyǵaryp tastaýǵa da quqyly.
A.Mılıýk otbasyndaǵy zorlyq-zombylyqtan zardap shekken kez kelgen adam quqyq qorǵaý organdaryna táýlik boıy jumys isteıtin «102» polısııa telefony nemese arnaıy mobıldi qosymsha arqyly habarlasa alatynyn eskertti. Budan bólek, IIM ókili turmystyq zorlyq-zombylyq faktisi týraly dabyl beretin qupııa sózdi paıdalana otyryp, polısııaǵa ýaqtyly habarlasýǵa múmkindigi joq zorlyq-zombylyq qurbandaryn anyqtaý boıynsha arnaıy algorıtm ázirlengenin de aıtty.
Memleket basshysy jaqynda ótken Ulttyq qoǵamdyq senim keńesiniń otyrysynda áıelderdi zorlyq-zombylyqtan qorǵaý jónindegi arnaıy polısııa ınspektorlarynyń shtat sanyn kóbeıtýdi sóz etken. Áıelderdiń quqyqtaryn qorǵaýda bul ınspektorlardyń alar orny erekshe ekeni daýsyz. Osyǵan oraı jaqynda ǵana mınıstrlik ishki rezervter esebinen arnaıy polısııa ınspektorlarynyń sanyn eki esege arttyryp, belgilengen standartqa deıin jetkizgen. Búginde elimizde 17 myńnan astam adam polısııa esebinde tursa, onyń 11 myńnan astamy otbasynyń bereketin alatyn zorlyqshyl retinde jiti baqylaýǵa alynǵan eken. Pandemııa kezinde 8 myńnan astam áıel senim telefondaryna qońyraý shalyp, quqyqtyq kómek suraǵan. Sońǵy bir jylda polısııa qyzmetkerleri 78 myńǵa jýyq qorǵaý nusqamasyn shyǵarsa, otbasynyń bereketin alǵan 10 myńǵa jýyq quqyq buzýshyǵa sot arqyly erekshe talaptar qoıylǵan.
