2020 jylǵy 4 naýryzda ótken tyńdaýlardyń qorytyndysy boıynsha Úkimetke 69 usynym toptamasy jiberilgen bolatyn. Búgin senatorlar birqatar mınıstrlikterdiń, salalyq memlekettik organdardyń jáne bıznes qaýymdastyqtyń basshylyǵymen qandaı tarmaqtardyń oryndalǵany jáne aldaǵy ýaqytta qaısysy oryndalatynyn talqylady.
Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekov ótken jyldyń jeltoqsanynda usynylǵan osyndaı esepke senatorlar rıza bolmaǵanyn eske saldy. Ol kezde usynystardyń oryndalýy tómen deńgeıde bolǵan edi. Sondyqtan taǵy bir kezdesý ótkizý týraly sheshim qabyldanǵan bolatyn.
«О́tken jylǵy jeltoqsandaǵy otyrysta bizdiń komıtet memlekettik organdardyń usynymdardy iske asyrý boıynsha jumys jetkilikti deńgeıde emes dep sheshti. Sondyqtan qazir biz sizdermen taǵy da kezdesip otyrmyz. Osy ýaqyt aralyǵynda memlekettik organdarmen belgili jumys júrgizilgenin atap ótkim keledi. Biraq, bul jerde osy saladaǵy máselelerdiń júıeli sheshilýi otandyq bıznes ókilderine baılanysty bolatynyn túsiný mańyzdy», - dedi Dáýren Ádilbekov.
Ulttyq ekonomıka mınıstriniń orynbasay Tımýr Jaqsylyqovtyń aıtýynsha, qazirgi kezde olardyń departamenti kásipkerlerdi daǵdarysqa qarsy memlekettik qoldaý sharalaryn júzege asyryp jatyr. Sonymen qatar, ekonomıkanyń eń kóp zardap shekken salalaryndaǵy shaǵyn jáne orta bızneske bank nesıelerin jeńildikpen qaıta qarjylandyrý tetigi iske qosyldy.
Indýstrııa jáne ınfraqurylymdy damytý mınıstriniń orynbasary Amanııaz Erjanov ta Senat usynymdarynyń oryndalýy týraly aıtty. Parlamenttik tyńdaýǵa qatysýshylar bergen usynystarynyń 40%-dan astamy qazirdiń ózinde oryndaldy. Qalǵan tarmaqtar ázirlenip jatqan 2025 jylǵa deıingi jeńil ónerkásipti damytýdyń jol kartasy jobasyna engizilgen.
Otyrystaǵy negizgi baıandamashy senator Edil Mamytbekov qazaqstandyq eksporttaýshylar EAEO keńistiginde jıi tap bolatyn saýda kedergileri problemalaryn, sondaı-aq bizdiń elge ımporttalatyn taýarlardyń sapasynyń tómendigi máselelerin sheshý áli de talap etilip otyrǵanyn atap ótti. Sonymen qatar, senatordyń aıtýynsha, qazirgi kezde mektep formasyn óndirýshilerge Ulttyq standartty mindetti etý asa mańyzdy. Bul qazaqstandyq mektep formasynyń óndirisin 100% ulǵaıtýǵa múmkindik beredi.
