Sýretti túsirgen Erlan OMAR, «EQ»
Qazaqstanda koronavırýstyń taralýyna jol bermeý jónindegi vedomstvoaralyq komıssııa el aımaqtaryndaǵy epıdemııalyq jaǵdaıdy baǵalaý matrısasyn jarııalady. 2021 jyldyń 4 sáýirindegi jaǵdaı boıynsha Nur-Sultan, Almaty qalalary men Almaty, Aqtóbe, Atyraý jáne Batys Qazaqstan oblystary «qyzyl aımaqta» tur. «Sary aımaqta» Shymkent qalasy jáne Aqmola men Qaraǵandy oblystary ornalasqan. Qalǵan barlyq óńir – «jasyl aımaqta». Elimiz taıaýda álemdik epıdemııalyq baǵalaý matrısasy boıynsha «qyzyl aımaqqa» ótken bolatyn.
Sońǵy derekke sáıkes Qazaqstanda 27 516 adam koronavırýs ınfeksııasynan (26 180 KVI+ jáne 1 336 KVI-) em alyp jatyr. Onyń ishinde 9 996 pasıent stasıonarda, 17 520 naýqas ambýlatorlyq deńgeıde em qabyldaýda. Koronavırýsqa shaldyqqandar arasynda 398 adamnyń jaǵdaıy aýyr, 103 pasıenttiń jaǵdaıy óte aýyr, 64 naýqas О́JT apparatynda jatyr. 2 sáýirde koronavırýstan 11 adam kóz jumǵan.
Qazirgi eń basty maqsat – halyqty ımmýndaý sharalaryn belsendi júrgizý. Sońǵy táýlikterde elimizdiń ár óńirinde myńdaǵan adamnyń óz erkimen ekpe alyp jatqany qaýipke qarsy kúresti árkimniń ózinen bastaýy qajettigin jete uǵynǵany dep qabyldaýǵa bolar. Osy oraıda otandyq kásipkerlerdiń de ortaq iske bilek sybana qatysýy qýantady. Máselen, elordada belgili kásipkerler iri saýda ortalyqtarynyń kınoteatrlaryn, qonaqúılerin egý pýnkti retinde paıdalanýǵa usynyp otyr. Sanıtarlyq dárigerler men densaýlyq saqtaý basqarmalary vaksınalaýǵa qajetti ınfraqurylymdy jasaqtaýǵa kiristi. Kóptegen egý pýnkti demalyssyz jumys istemek.
