Kollajdy jasaǵan Záýresh SMAǴUL, «EQ»
«Nazardaǵy basty másele, bul – adamdardyń densaýlyǵy. Biz Densaýlyq saqtaý mınıstrligimen kelisip, klınıkalyq zertteýlerdiń úshinshi kezeńinde vaksınanyń áserin tolyǵyraq zertteý úshin osyndaı taktıkany qoldandyq. Qazirgi ýaqytta vaksına Bıologııalyq qaýipsizdik problemalary ǵylymı-zertteý ınstıtýtynda Bilim jáne ǵylym mınıstrligi satyp alǵan qural-jabdyqtarmen óndirilip jatyr. Bul – biregeı qurylǵy. Eger mundaı qurylǵy qolda bolmaǵanda, biz búgingideı tamasha nátıje kórsete almas edik», dedi Bilim jáne ǵylym mınıstrligi Ǵylym komıtetiniń Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa.
Qazaqstandyq ǵalymdar otandyq vaksınany 2020 jyldyń 9 mamyrynda ázirlegenin aıta ketken jón. Ol qaýipsiz tehnologııa boıynsha ımmýnostımýlıator qosý arqyly óltirilgen vırýstan jasaldy.
2020 jyldyń 17 qyrkúıeginde 44 eriktiniń qatysýymen klınıkalyq zertteýlerdiń I kezeńi bastaldy. Vaksına qaýipsiz ekenin kórsetti. Eriktilerdiń jaǵdaıy qalypty boldy. 17 qazanda klınıkalyq zertteýlerdiń II kezeńi bastaldy. Oǵan 200 volonter qatysty. Zertteý nátıjeleri boıynsha vaksına joǵary ımmýnogendilik pen tıimdiligin kórsetti.
Byltyr 19 jeltoqsanda Densaýlyq saqtaý mınıstrligi klınıkalyq synaqtardyń qorytyndy III fazasyn júrgizýge ruqsat berdi. 3 myń adam erikti bolyp, QazVac brendimen QazCovid-in vaksınasy egildi. Vaksına eriktilerge arasyna 21 kún salyp, 2 márte egildi. Nátıjesinde, olardyń qanynda qajetti qorǵanys antıdeneleri paıda boldy. Eriktilerdiń jaǵdaıy jaqsy, shaǵymdary bolǵan joq. Bilim jáne ǵylym mınıstrligi baspasóz qyzmetiniń habarlaýynsha, 2021 jylǵy sáýir aıynyń sońynda klınıkalyq zertteýlerdiń III fazasynyń aralyq nátıjeleri belgili bolady. Sodan keıin otandyq vaksına jappaı paıdalanýǵa jiberiledi.
