Is-sharany ótkizý barysynda departament basshysynyń orynbasary, azamattyq qorǵaý polkovnıgi Oral Ábdirahmanov, tótenshe jaǵdaılardy joıý bóliminiń basshysy, azamattyq qorǵaý polkovnıgi Serik Naýryzbaev qurylymdyq bólimshelerdiń komandırlerinen is-qımyldarǵa daıyndyǵy týraly baıandamalaryn tyńdady. Sondaı-aq O.Ábdirahmanov tehnıkanyń, qural-jabdyqtardyń jınaqylyǵy men jaramdylyǵyna, parametrleriniń qoıylǵan maqsattarǵa sáıkestigine nazar aýdardy. «Sý tasqyny qaýpine jedel áreket etý úshin oblysta 7 negizgi top quryldy, olar oblys aýdandaryndaǵy neǵurlym qaýipti ýchaskelerge baǵyttalatyn bolady. Toptardyń quramynda 32 birlik arnaıy tehnıka, 160 adam bar. Árbir topta júzý quraldary, sý sorý tehnıkasy (42 birlik motopompa) bar. Jeke quram kombınezon jáne qutqarý keýdesheleri túrindegi qorǵanys quraldarymen qamtamasyz etildi», dedi ol. Sondaı-aq tasqynǵa qarsy kúreske Ulttyq ulannan 60 adam jáne 3 birlik tehnıka tartý kózdelgen. «Bul toptar Aıyrtaý jáne Ǵ.Músirepov aýdandarynyń shaǵyn ózenderine monıtorıng júrgizetin bolady. Qajet bolǵan jaǵdaıda olar muzdy jaryp, usaqtaý, evakýasııalyq is-sharalar júrgizedi», dedi S.Naýryzbaev.
Al kóktemgi sý tasqynynyń keshegi boljamy men oǵan qarsy jasalyp jatqan sharalar týraly departament bastyǵynyń orynbasary, maıor Murat Qanǵojınov bylaı dedi: «Sońǵy jyldary óńirde sý tasqynyna qarsy is-sharalardyń úlken kólemi júzege asyryldy, sonyń nátıjesinde 160-tan astam eldi mekende qaýip-qater tómendetildi. Atap aıtar bolsaq, 13 sý ótkizý qubyry ornatyldy, 500 metrden astam kedergi salyndy jáne 5,5 shaqyrymnan astam topyraq úıindileri nyǵaıtyldy. Budan basqa, sý basýǵa asa beıim ýchaskelerde 119 shaqyrymnan astam topyraq úıindileri men 7,5 shaqyrym qorǵanysh úıindileri salyndy». Sondaı-aq ol TJ departamentiniń toby qurylyp, turaqty daıyndyqqa keltirilgenin, sý basý qaýpi týyndaǵan jaǵdaıda evakýasııalanatyn halyqty ýaqytsha ornalastyrýdyń 325 pýnkti daıyndalǵanyn aıtty. Al 15 naýryzdan bastap oblys aýmaǵyndaǵy Aıyrtaý, Taıynsha, Ýálıhanov jáne Ǵ.Músirepov aýdandaryndaǵy 14 qaýipti sý qoımalarynda keptelisterdiń aldyn alý maqsatynda 4 630 sharshy metr jarylys jumystary júrgizilgenin atap ótti.
«Qazgıdromet» RMK Soltústik Qazaqstan oblysy boıynsha fılıaly dırektorynyń orynbasary Natalıa Levına oblys aýmaǵynda jylymyq temperatýranyń basym bolýy men jerdiń kúndelikti qatýy baıqalyp otyrǵanyn atap ótti.
Soltústik Qazaqstan oblysy
