Dúnıejúzilik mura qalalary uıymynyń seriktestigi sheńberinde uıymdastyrylǵan konferensııaǵa tarıhı-mádenı qundylyqtardy saqtaýda ozyq tájirıbeli Iran, Reseı, Serbııa, Túrkııa, Polsha, Gresııa, Indonezııa, Germanııa, Marokko, Albanııa, Qyrǵyzstan, О́zbekstan jáne Qytaı syndy álemniń 23 elinen 50-den astam qalanyń ókilderi qatysty. Onlaın-konferensııa aıasynda ejelgi mura men mádenıetti saqtaý, týrızmdi damytý, qalany durys josparlaý jáne abattandyrý, jańa qurylystar salý jaǵdaıynda onyń tarıhı tartymdylyǵyn saqtaý máseleleri talqylandy. Túrkistan qalasynyń ákimi Rashıd Aıýpov óz sózinde bıyl Túrkistannyń jasyna qatysty sensasııalyq jańalyq jarııa etilgenin atap ótti. «2020 jyly biz «Túrkistan qalashyǵynyń stratıgrafııasy» jobasyn qolǵa aldyq, onyń aıasynda Ejelgi qalanyń arheologııalyq keshenderi qaraldy. Qazba jumystary barysynda Túrkistan jerinde bizdiń dáýirimizge deıingi XVI-XIV ǵasyrlarǵa tán qonystyń paıda bolýynyń dálelderi tabyldy. Qalanyń ońtústik shetinde ornalasqan Sherbaı qorymynan tabylǵan qola dáýiriniń kesheni Túrkistannyń jasyn úsh myń jyl dep anyqtady», dedi Rashıd Abatuly. Sondaı-aq Túrkistan qalasynyń ákimi týrızmdi damytý, birlesken týrıstik týrlardy qurý, tikeleı áýe qatynasyn ulǵaıtý, jastardy tegin oqytý boıynsha tájirıbe almasý jáne gýmanıtarlyq kómek sııaqty dúnıejúzilik mura qalalaryn uıymdastyrýǵa qatysýshy elder arasyndaǵy yntymaqtastyq salalaryn keńeıtý týraly bastama kóterdi. Bul bastamany uıymnyń barlyq músheleri qoldady.
Jıyn sońynda Eýrazııanyń Dúnıejúzilik mura qalalary uıymynyń X halyqaralyq konferensııasynyń deklarasııasy qabyldandy.
