Máýlen Áshimbaev Memleket basshysy aqpan aıynda ótken Ulttyq qoǵamdyq senim keńesiniń otyrysynda ınklıýzıvti qoǵam qurýdyń jáne múmkindigi shekteýli azamattarǵa qolaıly orta qalyptastyrýdyń mańyzyna toqtalǵanyn tilge tıek etti. Senat Tóraǵasy erekshe qajettiligi bar jandarǵa qoldaý kórsetý qoǵamnyń damý jáne órkendeý deńgeıiniń mańyzdy kórsetkishteriniń biri ekenin aıtty. Bul baǵytta elimizde keshendi jumystar qolǵa alynǵanymen, sheshimin tappaǵan túıtkilder de bar ekeni belgili.
«Memleket tarapynan qabyldanǵan sharalarǵa qaramastan, erekshe qajettiligi bar azamattardy áleýmettik qorǵaýdyń tıimdi júıesin qurý áli de bolsa ózekti. Oǵan túrli úkimettik emes uıymdardan kelip túsetin ótinishter dálel. Sondyqtan biz búgingi kezdesýge barlyq múddeli tulǵalardy: senatorlardy, memlekettik organdardyń jáne osy baǵyttaǵy uıymdardyń basshylaryn arnaıy shaqyrdyq. Biz ózekti máselelerdi birlesip talqylap, bul saladaǵy zańnamalardy jetildirý jóninde aldaǵy baǵyt-baǵdardy aıqyndap alýymyz kerek», dedi Máýlen Áshimbaev.
Osy baǵyttaǵy júıeli qadamdardyń biri jekelegen sanattaǵy azamattardy áleýmettik qorǵaý máselelesi týraly zań qabyldaý ekeni sózsiz. Soǵan sáıkes Parlament depýtattarynyń qaraýyna tıisti qujat engizilgenin aıta ketken jón. Atalǵan zań jobasy erekshe qajettiligi bar jandardy qorǵaýdy jáne qoldaýdy kózdeıdi.
Statıstıkaǵa súıensek, búginde Qazaqstanda múmkindigi shekteýli 695 myńnan astam adam bar eken. Onyń 60 paıyzy (419,8 myń) eńbekke qabiletti jasta. Senat Spıkeri qoǵamdaǵy áleýmettik kózqaras múmkindigi shekteýli azamattar úshin óz áleýetin tolyq kórsetýge qıyndyq týǵyzatyn kedergilerdiń biri bolyp qalyp otyrǵanyna nazar aýdardy.
«Biz erekshe qajettiligi bar azamattarǵa qatysty qoǵamdyq sananyń túbegeıli jańarýyna yqpal etetin, qalyptasqan stereotıpterdi jáne kemsitýlerdi tolyq joıatyn sharalardy zańnamalyq turǵydan bekitip, qabyldaýymyz kerek», dedi Máýlen Áshimbaev.
Sondaı-aq, Senat Tóraǵasy múmkindigi shekteýli azamattardyń quqyqtaryn qorǵaýǵa qatysty jumystar aldaǵy ýaqytta da jalǵasa beretinin, oǵan barlyq múddeli taraptardyń ókilderi jumyldyrylatynyn atap ótti.
Odan bólek, búgingi kezdesýde aıtylǵan barlyq usynystar zań jobasyn jetildirý jáne sheshim qabyldaý barysynda eskeriletinin de aıtty.
