«Memleket tarapynan qabyldanǵan sharalarǵa qaramastan, erekshe qajettiligi bar azamattardy áleýmettik qorǵaýdyń tıimdi júıesin qurý áli de bolsa ózekti. Oǵan túrli úkimettik emes uıymdardan kelip túsetin ótinishter dálel. Sondyqtan biz búgingi kezdesýge barlyq múddeli tulǵalardy: senatorlardy, memlekettik organdardyń jáne osy baǵyttaǵy uıymdardyń basshylaryn arnaıy shaqyrdyq. Biz ózekti máselelerdi birlesip talqylap, bul saladaǵy zańnamalardy jetildirý jóninde aldaǵy baǵyt-baǵdardy aıqyndap alýymyz kerek», dedi Senat Tóraǵasy.
Máýlen Áshimbaev Senatqa múgedektigi bar adamdardyń quqyqtaryn qorǵaý jónindegi uıymdar ókilderiniń ótinishteri jıi kelip túsetinin atap ótti. Sondyqtan senatorlar qoǵam qaıratkerlerimen jáne osy saladaǵy sarapshylarmen kezdesý uıymdastyryp keledi. Al aldaǵy kezeńde depýtattyq korpýs qoldanystaǵy zańnamany ózgertý aıasynda erekshe qajettilikteri bar azamattardy qoldaý tetikterin muqııat pysyqtaýǵa nıettenip otyr. Engiziletin jańa ózgerister týraly Eńbek jáne halyqty áleýmettik qorǵaý mınıstri Serik Shápkenov aıtyp berdi.
Onyń aıtýynsha, 1 nemese 2 toptaǵy múgedek balalardy tárbıelep otyrǵan otbasylar, tipti osy balalar kámelettik jasqa tolsa da, turǵyn úı kezeginde óz oryndaryn saqtap qalatyny kózdelip otyr. Al 1 toptaǵy múgedekterge kútim jasaıtyn adamdar járdemaqy ala bastaıdy.
"Zań jobasynda balalardy múgedektigi boıynsha járdemaqylardyń mólsherin qaıta qaraı otyryp, 7 jastan 16 jasqa deıingi múgedektik toptar boıynsha bólý, múgedektigi boıynsha jáne asyraýshysynan aıyrylý jaǵdaıy boıynsha járdemaqylardy bir mezgilde alý quqyǵyn berý, "ınvataksı" qyzmeti portalyna aýystyrý, sondaı-aq arnaýly áleýmettik qyzmetter men jumysta mertikken nemese kásiptik aýrýdan múgedek bolǵan adamdardy áleýmettik qoldaý sharalary kózdelgen", dep atap ótti Serik Shápkenov.
Qazirgi ýaqytta bul zań jobasy Parlament depýtattarynyń qaraýynda jáne erekshe qajettilikteri bar adamdardy qorǵaý jáne qoldaý salasyndaǵy problemalardy sheshýge baǵyttalǵan.
Kezdesýde sondaı-aq senator Aqmaral Álnazarova erekshe qajettilikteri bar adamdardy zańdy túrde kemsitýden qorǵaýdy usyndy.
