Bolashaq jazýshy óziniń kindik qany tamǵan aýylynda bastaýysh bilim alyp, keıin Sháýeshek gımnazııasyn bitiredi. Alǵashqy óleńderi «Shyńjań» gazetinde, al tyrnaqaldy áńgimesi «Shuǵyla» jýrnalynda jarııalanǵan. 1956 jyly Qytaı úkimetiniń joldamasymen Almatyǵa kelip, Qazaq memlekettik ýnıversıtetiniń fılologııa fakýltetine oqýǵa tústi. KSRO men Qytaı memleketi arasyndaǵy saıası jaǵdaıǵa baılanysty oqýdan keri shaqyrylyp, 1958-1962 jyldar aralyǵynda qýǵyn-súrginge ushyraıdy. 1962 jyly ımperııa shekarasy shyrǵalańyn kókteı ótken qazaq kóshimen birge atajurtqa oralyp, oqýyn aıaqtaıdy.
Qalamgerdiń osyndaı kúrespen bastalǵan ómiri atamekeniniń asqaq armandary, el úmiti men múddesi, táýelsizdiktiń araıly tańy atqannan keıin jas memlekettiń qalyptasýy jáne qaıta órleýi, ulttyq qundylyqtar men jas urpaqqa rýhanı tárbıe berý jolyndaǵy izdenister men talpynystarǵa ulasty. Sol talpynystar onyń qalamynan týǵan árbir shyǵarmasynan anyq kórindi.
«Jas dáýren», «Qazdar qaıtyp barady», «Kókeıkesti», «Sońǵy kósh», «Baqyt jolynda», «Sarjaılaý», «Sharaına», «Sáıgúlikter», «Atameken», «Taǵdyr», «Daraboz» sekildi povesteri men romandary el tarıhy men taǵdyrynyń eń bir kúrdeli kezeńderi jaıly oı tolǵaǵan, onyń jarqyn bolashaǵyna sengen shyǵarmalar boldy. «Sońǵy kósh» dılogııasy úshin Áýezov atyndaǵy ádebı syılyqty alsa, «Taǵdyr» romany úshin Abaı atyndaǵy Memlekettik syılyqtyń laýreaty boldy. Ár jyldary «Qazaq ádebıeti» gazetinde, «Jazýshy» baspasynda, Memlekettik baspalar komıtetinde qyzmet istep, keıingi qyryq jyldan astam ýaqytyn shyǵarmashylyqqa arnady.
Jazýshyny qalamy shyrqaý bıikke – dańq pen bedeldiń shyǵanyna ǵana emes, týǵan eliniń mahabbaty men qurmetiniń, oqyrmannyń shynaıy baǵasynyń bıigine kóterdi.
«Egemen Qazaqstan» gazeti el ómirin jyrlaǵan eren qýatty qalam ıesi, halqymyzdyń qadirli qarııasy, oqyrmandardyń izdep júrip oqıtyn jazýshysy bolǵan Qabdesh Jumadilovtiń qazasyna qaıǵyra otyryp, qalamgerdiń otbasyna, qalyń oqyrmanyna kóńil aıtady.
Egemenqazaqstandyqtar
