8 myńnan astam adamǵa ekpe egildi

Oblystyq densaýlyq saq­taý basqarmasy maman­da­­ry­nyń máli­metinshe, Sovid-19 ınfek­sııa­­syna qar­sy vaksınanyń birinshi kom­po­nentin 14 mem­le­ket­tik qyz­met­ker jáne sozylmaly aýrý­lary bar 157 adam alǵan. Sony­men qatar 403 pedagog, 410 kúsh qurylymdarynyń qyzmetkeri, 107 ýchaskelik polısııa qyzmetkeri, 88 medı­sı­nalyq-áleýmettik jáne ja­byq balalar mekemeleriniń qyzmetkeri vaksınalandy. Odan bólek, indetpen betpe-bet kúresýi múmkin 7 282 medısına qyzmetkerine ekpe egildi. Erikti túrde ekpe alyp jat­qan­dar­dyń ishinde stýdentter men qatardaǵy qarapaıym halyq ta bar.

1 sáýir kúni alǵashqylardyń biri bolyp ekpe salǵyzǵan Kókpekti aýdanyna qarasty Sa­mara orta mektebiniń aǵyl­shyn tili pániniń oqytý­shy­sy Anar Ahmadıeva vaksınany ınternet arqyly muqııat zerttepti. Sheteldik joǵary sanatty dári­gerlerdiń, ǵalymdardyń dálel­di pikirlerin oqyǵan, aqyl-keńesterine qulaq túrgen. Onyń ústine byltyrǵy jazda halyq­tyń jappaı aýyrǵanyn eskerip baryp, ekpe alýǵa bel býǵan.

– Men vaksına alýǵa óz erkim­men sheshim qabyldadym. О́ıtkeni biz mektepte jumys iste­gendikten, kún saıyn balalarmen, ata-analarmen betpe-bet kezdesemiz. О́zimdi ǵana emes, otbasymnyń, týǵan-týystarymnyń densaýlyǵyn da oıladym. Qudaı saqtasyn, aýrý juqtyryp alyp, em izdegenshe, aldyn alyp qoıǵan jón. Ekpeni kóz juma baryp qoıdyra salǵan joqpyn, quramyn da zerttedim. Dárigerlerdiń aıtqan sózderin tarazyladym, – deıdi mektep muǵalimi Anar Qadyrbekqyzy.

Ekpe alǵan azamattardyń aıtýynsha, prosedýra bas­tal­mas buryn dárigerler túsin­dirý jumystaryn júr­gi­zedi. Terapevt dáriger pasıent­ter­diń densaýlyǵyn mu­qııat tek­se­rip shyǵady. Aq halat­ty­lar­­dyń aıtýynsha, ekpe egil­gen soń keıbir pasıentterdiń dene qyzýy kóterilýi múmkin. Keıbir jaǵdaıda temperatýra 39,2 gradýsqa deıin barady. Oǵan alańdaýǵa esh negiz joq. Ystyq kóterilgen jaǵdaıda dárigerdiń bergen resepti bo­ıynsha dári-dármek qabyldap, dene temperatýrasyn qalypqa keltirýge bolady.

Abyroı bolǵanda, osy ýa­qyt­qa deıin ekpe alǵandardyń ishinde densaýlyǵy nasharlap, dárigerdiń kómegine júgingen eshkim joq. Bári sátimen ótip jatqan kórinedi. Birinshi vaksınasyn alǵan azamattar endi ekinshi komponentti alýǵa daıyndalady.

Shyǵys Qazaqstan oblysy