12 shaǵyn aýdannyń 25-úıiniń turǵyndarynyń aıtýynsha 57-páterde turatyn kórshileri biraz ýaqyttan beri úıinde birneshe kúrketaýyqty asyraıdy. Sonyń kesirinen úıdiń kireberisinen-aq jaǵymsyz ıis múńkip turady eken. Tipti, páterlerde jándikter men tyshqan qaptap ketken kórinedi.
- Munda balaly jas otbasylar bar. Solardyń bárine de zııan. Bul qora emes, páter ǵoı, - deıdi turǵyn Abýtáli Aıtmaǵanbetov.
О́zge de turǵyndar páterin taýyqqoraǵa aınaldyrǵan kórshilerine ashýly.
- Sanıtarlyq talap saqtalmaǵan turǵyn úıde ómir súrýge májbúr bolyp otyrmyz. Kúrketaýyq baǵatyn kórshimizdiń páterinen jaǵymsyz ıis shyǵady. Dem alý múmkin emes. Úıimizde jándik pen tyshqan qaptap ketti. Quzyrly organdarǵa shaǵymdandyq. Biraq, áreket joq, - dedi atyn ataǵysy kelmegen turǵyn.
Turǵyndar kórshileri esigin ashpaq túgili baılanysqa da shyqpaıdy dep polısııaǵa shaǵymdanǵan. Quzyrly organnyń qyzmetkerleri 5 sáýir kúni taǵy kelse de páterdiń esigin asha almady. Ýchaskelik polıseılerdiń aıtýynsha, olar esikti buzyp kire almaıdy.
- Bul jaǵdaı boıynsha ýchaskelik ınspektor turǵyndardyń aryzyn qabyldap, habarlama arqyly Aqtaý qalalyq ákimdigine jáne sanıtarlyq epıdemıologııalyq stansasyna joldaǵan. Aldaǵy ýaqytta qalalyq ákimdikten nemese SES-ten habar bolady, - dedi Ýchaskelik polısııa bólimshesiniń bastyǵynyń orynbasary Erkin Eleýsizov.
Al Mańǵystaý oblystyq veterınarııa basqarmasynyń veterınarlyq-sanıtarlyq qaýipsizdigi bóliminiń basshysy Nursultan Dúısebek ózderine baqylaý, qadaǵalaý jáne tekserý fýnksııasy júktelmegenin aıtty. Bul máselege sanıtarlyq epıdemıologııalyq stansa men veterınarlyq ınspeksııa aralasý kerektigin jetkizgen. Al qalalyq SES bul jaǵdaıǵa qatysymyz joq dep otyr. Veterınarlyq ınspeksııa ózderi tekseris júrgize almaıtynyn, tek ákimdik tarapynan komıssııa qurylsa iske kirisetinderin aıtqan.
