Vıse-mınıstrdiń aıtýynsha, ondaǵy málimetter shyndyqqa janaspaıdy.
«Sońǵy on jylda kól deńgeıi Baltyq júıesi boıynsha 341 M belgisinen tómen túspegenin atap ótken jón. Ǵalymdar kóp jylǵy baqylaýlar men zertteýlerge súıene otyryp, Balqash kóliniń tolyqqandy sý obektisi retinde ómir súrýiniń ońtaıly deńgeıi BJ boıynsha 341 M belgisi dep paıymdaıdy» dedi Serik Qojanııazov.
Onyń aıtýynsha, jyl saıyn Balqashqa 12 tekshe metr sý quıylsa, kóldiń turaqty deńgeıde saqtalýyna kepildik beriledi. Sonymen birge, Dobyn shekara beketindegi gıdrologııalyq derekterdi taldaý Ile ózeniniń ortasha uzaq merzimdi aǵyny 2001 jyldan 2020 jylǵa deıin 13,8 tekshe metrdi quraıtynyn kórsetti.
«Osylaısha, búgingi tańda Aral taǵdyrynyń qaıtalanýy Balqash kóline qaýip tónip turǵan joq», dep atap ótti vıse-mınıstr.
Ekologııa mınıstrligi basshysynyń orynbasary Qytaı Halyq Respýblıkasymen sý bólý jónindegi kelissózder prosesinde qazaqstandyq taraptyń ustanymy Ile ózeniniń aǵynyn keminde 12 tekshe metr kóleminde ustap turý ekenin málimdedi.
«Bizdiń elimizdiń ustanymy sý bólý kezinde ekojúıeniń múddelerin eskerý. Osyǵan baılanysty, Qazaqstan tarapy Balqash kólin Ile ózeniniń negizgi sý tutynýshylarynyń biri retinde kórsetedi. Biz Balqash kóli ózen aǵysynyń kólemine baılanysty ekenin aıtýdan jalyqpaımyz», dedi Serik Qojanııazov.
Sonymen qatar, vıse-mınıstr Qytaı tarapy da óziniń shekarasyna jaqyn aýmaqta ekologııalyq apattyń oryn alýyn qalamaıdy degen boljam aıtty.
«Buǵan 2019 jyldyń qazan aıynda Beıjińde ótken Birlesken komıssııanyń 17-shi otyrysynda Qytaı tarapy transshekaralyq ózenderdi sý bólý týraly kelisim jobasyn talqylaý kezinde Taraptardyń ekojúıelerin damytý men saqtaý múddelerin eskerýge keliskendigi dálel. Bul Balqash kóliniń ekologııalyq jaǵdaıy úshin óte mańyzdy», dep habarlady Serik Qojanııazov.
