«Elimizde týrızm salasyn damytý mańyzdy maqsattardyń biri. Búgin qabyldanǵan zań osy baǵytta keshendi zańnamalyq negiz qalyptastyrady. Soǵan sáıkes qarjylaı qoldaý tetikteriniń de aýqymy keńeıdi. Olardyń qatarynda ınvestısııalyq jeńildikter, týrıstik qyzmetti yntalandyrý, syrttan týrıster ákeletin týroperatorlardyń shyǵyndaryn sýbsıdııalaý sııaqty basymdyqtar bar», – dedi Máýlen Áshimbaev.
Sonymen qatar Senat otyrysynda depýtattar «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkasııalaý týraly» zańdy qarap, qabyldady. Osy qujat arqyly kóshi-qon prosesteri men azamattyq máselelerin retteý jáne zańsyz kóshi-qon arnalaryn anyqtaý boıynsha málimetter almasý úshin qolaıly jaǵdaılar jasalady. Sol arqyly taraptar statıstıkalyq, quqyqtyq jáne ǵylymı-ádistemelik aqparattarmen, óz aýmaǵyndaǵy eki memlekettiń azamattary týraly málimettermen bólisýge múmkindik alady. Odan bólek, yntymaqtastyq aıasynda týyndaıtyn máseleler boıynsha ózara tájirıbe almasýǵa da jol ashylady.
«Bul kelisim zańsyz kóshi-qonǵa qarsy kúreste jáne kóshi-qon prosesterin retteýde qosymsha quqyqtyq tetikter qalyptastyrady. Sondaı-aq, atalǵan zań eki el arasyndaǵy osy sala boıynsha yntymaqtastyqty nyǵaıtýǵa oń yqpalyn tıgizedi», – dedi Senat Tóraǵasy.
Otyrys barysynda senatorlar «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasynyń jekelegen normalary boıynsha Májilis pen Senat arasyndaǵy kelispeýshilikti eńserý jónindegi kelisim komıssııasynyń usynysyn da qarap, qabyldady.
«Osy qujatty qaraý barysynda zań konsýltanttary palatalarynyń Respýblıkalyq zań konsýltanttary alqasyna mindetti múshe bolýy týraly norma qyzý talqylanǵan edi. Osyǵan oraı kelisim komıssııasynyń usynystaryn eskere otyryp, atalǵan norma zańnan alynyp tastaldy. Soǵan sáıkes, Respýblıkalyq alqaǵa múshe bolý, tıisinshe oǵan jarna tóleý erikti túrde júrgiziledi», – dedi Máýlen Áshimbaev.
Sondaı-aq, otyrys kezinde senator Erik Sultanov gazben qamtamasyz etý jumystaryn quqyqtyq retteýdi jetildirý jóninde depýtattyq saýal joldady. Ol óz saýalynda gaz ballondarynyń jarylý saldarynan bolatyn qaıǵyly oqıǵalardyń aldyn alýǵa arnalǵan usynystaryn jetkizdi.
