Onyń aıtýynsha, bakalavrıatqa túsýshiler mindetti túrde UBT tapsyryp, sol sertıfıkatpen tıisti bazaǵa tirkeledi. Osylaısha, konkýrsqa qatysyp, sol ballmen grant utyp alýy múmkin.
«Al magıstratýraǵa kelsek, ol da eki jyldan beri UBT sııaqty testileý formatynda ótkizilip keledi. Ár ýnıversıtet óz bıletterin, tapsyrmalaryn daıyndap, ózderi tekserip, sheshim qabyldaıdy. Ártúrli táýekelder boldy, sondyqtan magıstratýraǵa qabyldaý tetigin, jalpy rásimin ózgerttik. Aldyńǵy jyly da, bıyl da, magıstratýraǵa qabyldaý elektrondy formatta naqty testileýdiń, ortalyqtandyrylǵan test nátıjesinde júrgiziledi. Olar óz qujattaryn tapsyryp, jınaǵan balldaryna qaraı grant utyp alýy múmkin», dedi mınıstr.
Pandemııaǵa baılanysty sońǵy kýrsta oqıtyn stýdentter men magıstranttardyń dıplom qorǵaýyna da birqatar ózgerister engizildi.
«Qazirgi kezde stýdentterdiń kóbisi qashyqtan, keıbiri jataqhanada jatyp oqyp jatyr. Kóptegen muǵalimder de, oqytýshylar da qashyqtan oqytý formatynda bolǵannan keıin olardyń dıplomdaryn, ári magıstrlardyń dıssertasııalaryn qorǵaý rásimin elektrondy formatta ótkizýge bolady. Mórdiń, qoldyń qoıylýy sııaqty mindetti talaptardy da alyp tastadyq. Qazir túsindirý jumystary júrgizilýde», dedi A.Aımaǵambetov.
BǴM basshysy qazirgi ýaqytta PhD dıssertasııalaryn da onlaın túrde qorǵaýǵa múmkindik berilgenin atap ótti. Bul halyqaralyq tájirıbe. Bastysy, sapany tómendetpeý. Osy baǵytta tıisti jumystar júrgizilýde.
